डॉ. अशोक बालगुडे
पुणे, दि. ४ : ‘तुम्ही प्रकृतीची काळजी घ्या, सुप्रिया आणि आम्ही देश सांभाळू; तुम्ही आम्हाला आशीर्वाद द्या,’ अशा शब्दांत पंतप्रधान नरेंद्र मोदी यांनी बुधवारी (दि. ४ नोव्हेंबर, २०२६) राष्ट्रवादी काँग्रेस (शरदचंद्र पवार) पक्षाचे अध्यक्ष शरद पवार यांची दूरध्वनीवरून विचारपूस केली. प्रकृतीला प्राधान्य देऊन प्रवास कमी करावा, पुरेशी विश्रांती घ्यावी आणि आहाराकडे लक्ष द्यावे, असा सल्लाही मोदी यांनी दिला.
शरद पवार यांना दोन दिवसांपूर्वी छातीत दुखणे आणि खोकल्याचा त्रास झाल्याने पुण्यातील रुबी हॉल क्लिनिकमध्ये दाखल करण्यात आले होते. वैद्यकीय तपासणीनंतर प्रकृती स्थिर असल्याने बुधवारी त्यांना रुग्णालयातून घरी सोडण्यात आले. त्यानंतर ते मुंबईला रवाना झाले.
पवार यांचे निकटवर्तीय विठ्ठल मणियार यांनी पत्रकारांशी बोलताना मोदी यांच्या दूरध्वनीवरील संभाषणाची माहिती दिली. मोदी यांनी पवारांना विश्रांती घेण्यास सांगितले. सुप्रिया सुळे आणि अन्य नेते देशाची जबाबदारी सांभाळतील, त्यामुळे त्यांनी प्रकृतीकडे लक्ष द्यावे, असेही त्यांनी सांगितल्याचे मणियार यांनी स्पष्ट केले.
मोदी यांच्या फोनबद्दल पवार यांनी आभार मानले. देशाची काळजी करण्याची आवश्यकता नाही; मोदींसह अन्य नेते देशाची जबाबदारी सांभाळत असल्याचे त्यांनी उत्तरात सांगितल्याची माहिती मणियार यांनी दिली.
दरम्यान, रुबी हॉल क्लिनिकचे मुख्य हृदयरोगतज्ज्ञ डॉ. पुरवेझ ग्रँट यांनी पवार यांची प्रकृती स्थिर असून ते बरे असल्याचे अधिकृत निवेदनाद्वारे स्पष्ट केले. त्यांच्या प्रकृतीत सुधारणा झाल्याने त्यांना रुग्णालयातून सोडण्यात आले.
