पुणे : पुण्यातील स्वारगेट पोलीस ठाण्याच्या हद्दीत पायल झांबरे या विवाहितेने आत्महत्या केल्याच्या घटनेने शहरात खळबळ उडाली आहे. सासरच्या मंडळींकडून मानसिक आणि शारीरिक छळ होत असल्याने पायलने टोकाचे पाऊल उचलल्याचा आरोप तिच्या कुटुंबीयांनी केला आहे. या प्रकरणी पायलचा पती, सासू-सासरे आणि नणंद यांच्याविरोधात स्वारगेट पोलीस ठाण्यात गुन्हा दाखल करण्यात आला आहे.
बुधवारी पायलच्या सासू-सासऱ्यांना अटक करून न्यायालयात हजर करण्यात येणार असल्याची माहिती समोर आली. मात्र, न्यायालयीन प्रक्रिया सुरू होण्यापूर्वीच पायलच्या संतप्त नातेवाईकांसह नागरिकांनी पुणे जिल्हा सत्र न्यायालयाबाहेर मोर्चा काढत ठिय्या आंदोलन केले.
या प्रकरणाचा खटला फास्ट ट्रॅक कोर्टात चालवून आरोपींना कठोर शिक्षा देण्यात यावी, अशी मागणी आंदोलकांनी केली. पायलच्या काकू, भाऊ आणि अन्य नातेवाईकही या आंदोलनात सहभागी झाले होते.
“आमच्या मुलीला न्याय मिळाला पाहिजे. तिला खूप त्रास दिला आणि हे कृत्य करण्यास भाग पाडले. कुणालाही सोडू नका, आरोपींना फाशी द्या,” अशी मागणी पायलच्या काकूंनी केली.
पायलच्या भावानेही आरोपींना कठोरातील कठोर शिक्षा देण्याची मागणी केली. पायलला सुरुवातीपासून त्रास दिला जात होता. ती खंबीर होती आणि अनेक गोष्टी सहन करत होती. मात्र, अखेर तिच्यासोबत अशी घटना घडली, असे म्हणत भावाने संताप व्यक्त केला. तसेच आरोपींच्या बाजूने कोणत्याही वकिलाने बाजू मांडू नये, अशी मागणीही करण्यात आली.
पुणे जिल्हा सत्र न्यायालयाबाहेर झालेल्या या आंदोलनात मोठ्या संख्येने नागरिक सहभागी झाले होते. पायलला न्याय मिळावा आणि या प्रकरणातील आरोपींना कठोर शिक्षा व्हावी, अशी मागणी यावेळी करण्यात आली.
दरम्यान, या प्रकरणाचा पुढील तपास स्वारगेट पोलीस करीत आहेत. तपासातून समोर येणाऱ्या पुराव्यांच्या आधारे पुढील कायदेशीर प्रक्रिया पार पडणार आहे.
