डॉ. अशोक बालगुडे
भोर, दि. ४ : जिद्दीला कष्टांची जोड मिळाली की स्वप्नांना नवी दिशा मिळते, याचा प्रत्यय भोर तालुक्यातील केंजळ गावच्या वैष्णवी बाठे हिने दिला आहे. शेतकरी कुटुंबातील वैष्णवीने अभियांत्रिकीचे शिक्षण पूर्ण करतानाच नोकरीसाठीची निवड मिळवली. सहा महिन्यांचे विशेष प्रशिक्षण यशस्वीरीत्या पूर्ण करून ती आता मेट्रोची सारथी बनली आहे. शेताच्या मातीतून आधुनिक मेट्रोच्या नियंत्रण कक्षापर्यंतचा तिचा प्रवास ग्रामीण मुलींच्या स्वप्नांना बळ देणारा आहे.
वडिलांच्या कष्टातून मिळालेली जिद्द आणि शिक्षणातून घडलेला आत्मविश्वास यांच्या जोरावर वैष्णवीने पुरुषप्रधान समजल्या जाणाऱ्या क्षेत्रातील आव्हान स्वीकारले. अभियांत्रिकीचे शिक्षण घेत असतानाच झालेली निवड आणि त्यानंतरचे कठोर प्रशिक्षण पार करत तिने मेट्रोचालकाची जबाबदारी सांभाळली.
वैष्णवीसोबत प्रशिक्षण घेतलेल्या अनेक तरुणीही आज मेट्रोचालक म्हणून कार्यरत आहेत. ‘बेटियां किसीसे कम नहीं’ हा संदेश वैष्णवीने भाषणातून नव्हे, तर कर्तृत्वातून दिला आहे. तिचे यश केवळ एका कुटुंबाचा आनंद नाही; तर ग्रामीण भागातील प्रत्येक मुलीला स्वतःची स्वप्ने मोठी पाहण्याची आणि ती पूर्ण करण्यासाठी धडपडण्याची प्रेरणा देणारी कहाणी आहे. केंजळ गावाची मान उंचावणाऱ्या वैष्णवीने दाखवून दिले आहे की, स्वप्नांना गावाच्या सीमा नसतात आणि कर्तृत्वाला लिंगाचे बंधन नसते.
