पुणे: पुणे शहरात सध्या बाल गुन्हेगारीचे सत्र वाढताना दिसत असून, ही बाब सामाजिक सुरक्षेसाठी गंभीर बनली आहे. विशेषतः धनकवडीसारख्या भागांत अल्पवयीन मुलांकडून दुचाकी आणि रिक्षा चोरण्याचे प्रकार वाढल्याने स्थानिक पोलिसांची डोकेदुखी वाढली आहे. नुकत्याच भारती विद्यापीठ पोलिसांनी केलेल्या एका कारवाईतून या गुन्हेगारी टोळीचा भांडाफोड झाला आहे.
गोपनीय माहिती मिळाल्यानंतर भारती विद्यापीठ पोलिसांचे पथक वंडरसिटी रोडवर संशयास्पद हालचाली करतांना एका अल्पवयीन मुलाला पोलिसांनी ताब्यात घेतले. त्याच्याकडे चोरीची एक रिक्षा आणि दुचाकी सापडली. अधिक चौकशी केली असता, त्याने आपल्या इतर साथीदारांसह मिळून शहरातील विविध ठिकाणांवरून वाहने चोरल्याचे कबूल केले.
पोलिसांनी या कारवाईदरम्यान २ दुचाकी आणि १ रिक्षा असा एकूण २ लाख ३५ हजार रुपये किमतीचा ऐवज जप्त केला आहे. या एका अटकेमुळे वाहन चोरीचे ३ जुने गुन्हे उजेडात आले आहेत.
