पुणे: पुण्यात अलीकडच्या काळात गुन्हेगारीच्या घटना वाढत असल्याचे चित्र आहे. अशातच, पुण्यात भररस्त्यात गोळीबाराचा थरार पाहायला मिळाला आहे. कात्रज-मंतरवाडी बायपास रोडवर असलेल्या एका दुकानासमोर काही अज्ञात व्यक्तींनी पिस्तुलातून हवेत गोळ्या झाडल्याची घटना घडली. अचानक झालेल्या गोळीबाराच्या आवाजामुळे परिसरात एकच खळबळ उडाली आणि नागरिकांमध्ये भीतीचे वातावरण पसरले.
मिळालेल्या माहितीनुसार, दुचाकीवरून आलेल्या दोन अज्ञात तरुणांनी या दुकानाजवळ थांबून त्यांच्याकडील पिस्तुलातून हवेत एकूण 4 गोळ्या झाडल्या. सुदैवाने, या घटनेत कोणालाही दुखापत झालेली नाही किंवा कोणतीही जीवितहानी झालेली नाही. दिवसाढवळ्या भररस्त्यात घडलेल्या या प्रकारामुळे परिसरातील नागरिकांच्या सुरक्षेचा प्रश्न पुन्हा एकदा ऐरणीवर आला आहे. गोळीबार करून हे दोन्ही आरोपी आपली दुचाकी सासवडच्या दिशेने वेगाने पळवत फरार झाले.
घटनेची माहिती मिळताच स्थानिक पोलिसांनी तातडीने घटनास्थळी धाव घेतली. पोलिसांनी तातडीने परिसराचा पंचनामा केला असून, आरोपींचा शोध घेण्यासाठी सासवड मार्गावर कडक नाकेबंदी करण्यात आली आहे. हे तरुण नक्की कोण होते आणि त्यांनी हा गोळीबार कोणत्या कारणासाठी केला, याचा तपास पोलीस करत आहेत.
