पुणे: पुण्यातील खराडी परिसरात पती-पत्नीतील किरकोळ वादाचे रूप थेट हत्येत झाल्याची धक्कादायक घटना समोर आली आहे. संतापाच्या भरात पतीने पत्नीच्या डोक्यात छोटा गॅस सिलेंडर मारल्याने तिचा जागीच मृत्यू झाला. या घटनेनंतर आरोपी पती फरार झाला असून पोलिसांनी त्याच्या शोधासाठी विशेष पथके रवाना केली आहेत.
मृत महिलेचे नाव किरण बाबर असून तिचे वय अंदाजे 30 ते 32 वर्षे असल्याची माहिती आहे. तर जयराम बाबर असे आरोपी पतीचे नाव आहे. दोघेही मूळचे मध्य प्रदेशातील रहिवासी असून रोजगाराच्या निमित्ताने पुण्यात वास्तव्यास होते.
पोलिसांनी दिलेल्या माहितीनुसार, हे दाम्पत्य खराडीतील एका लेबर कॅम्पमध्ये राहत होते. दोघेही कचरा संकलनाच्या वाहनावर काम करून आपला उदरनिर्वाह करत होते. मंगळवारी मध्यरात्री त्यांच्या घरात किरकोळ कारणावरून वाद झाला. सुरुवातीला शाब्दिक बाचाबाची झाली, मात्र काही वेळातच हा वाद विकोपाला गेला.
रागाच्या भरात जयराम बाबर याने घरात असलेला छोटा गॅस सिलेंडर उचलून पत्नीच्या डोक्यात जोरात मारला. या हल्ल्यात किरणच्या डोक्याला गंभीर दुखापत झाली. मोठ्या प्रमाणात रक्तस्त्राव झाल्याने तिचा घटनास्थळीच मृत्यू झाला.
घटनेची माहिती मिळताच खराडी पोलिसांनी तातडीने घटनास्थळी धाव घेतली. पोलिसांनी पंचनामा करून मृतदेह शवविच्छेदनासाठी पाठवला आहे. प्राथमिक तपासानंतर आरोपीविरुद्ध खुनाचा गुन्हा दाखल करण्याची प्रक्रिया सुरू करण्यात आली आहे.
घटनेनंतर आरोपी जयराम बाबर फरार झाला असून त्याचा शोध घेण्यासाठी पोलिसांनी विशेष पथके तयार केली आहेत. या घटनेमुळे खराडी परिसरात हळहळ व्यक्त केली जात असून, कौटुंबिक वादातून घडलेल्या या दुर्दैवी घटनेची सर्वत्र चर्चा सुरू आहे. पोलिसांकडून पुढील तपास सुरू आहे.
