लोहगड: लोहगड किल्ल्यावर घडलेल्या केतन अग्रवालच्या दुर्देवी मृत्यूने आता संपूर्ण पुणे हादरले आहे. सुरुवातीला हा एक अपघात असल्याचे भासवले जात होते, पण पोलीस तपासात या मृत्यूमागचे भयानक सत्य समोर आले आहे. हा अपघाती मृत्यू नसून, केतनचा थंड डोक्याने केलेला खून असल्याचे निष्पन्न झाले आहे. याप्रकरणी केतनची होणारी पत्नी सिया गोयल आणि तिचा प्रियकर चेतन चौधरी यांना पोलिसांनी अटक केली असून, त्यांना ७ दिवसांची पोलीस कोठडी सुनावली आहे.
खुनाचा मास्टरप्लॅन आणि कॅफेमधील ती बैठक
मिळालेल्या माहितीनुसार, सिया आणि चेतन यांची ओळख गेल्या दिवाळीत एका पार्टीत झाली होती. ओळखीचे रूपांतर लवकरच प्रेमात झाले. दरम्यान, सियाचे लग्न केतनशी ठरले होते, पण तिला हे नाते नको होते. केतनला मार्गातून हटवण्यासाठी तिने प्रियकर चेतनच्या मदतीने एक क्रूर योजना आखली. लोहगड किल्ल्यावरील कोणता असा दुर्गम भाग आहे, जिथून ढकलल्यास व्यक्ती वाचू शकणार नाही, याचा पूर्ण सराव आणि अभ्यास या दोघांनी एका कॅफेमध्ये बसून केला होता.
तपासादरम्यान पोलिसांच्या हाती डिजिटल पुरावा लागले आहेत. मागील ६ महिन्यांत सिया आणि चेतन यांच्यात तब्बल २,००४ वेळा फोनवर संवाद झाला होता. या कालावधीत त्यांनी एकूण २३८ तास एकमेकांशी चर्चा केली होती. या प्रदीर्घ संवादातूनच हत्येचा पूर्ण आराखडा तयार करण्यात आला होता.
केतनच्या हत्येचा हा पहिलाच प्रयत्न नव्हता. १४ जून रोजीदेखील सियाने त्याला किल्ल्यावरून खाली ढकलण्याचा प्रयत्न केला होता. पण सियाच्या या क्रूर खेळीमुळे शेवटी त्याचा जीव गेलाच.
