मुंबई: मुंबईच्या लोकल ट्रेनमध्ये प्रवाशांच्या सुरक्षेचा प्रश्न पुन्हा एकदा चव्हाट्यावर आला आहे. पश्चिम रेल्वे मार्गावर एका किरकोळ वादाचे रूपांतर भीषण हत्येत झाल्याची धक्कादायक घटना समोर आली आहे. मयांक लोहार असे या तरुणाचे नाव असून, या घटनेने संपूर्ण मुंबईत संतापाची लाट पसरली आहे.
मिळालेली माहिती अशी की, मंगळवारी रात्री १० च्या सुमारास अंधेरी ते बोरिवली दरम्यान धावणाऱ्या लोकलमध्ये हा प्रकार घडला. विरारचा रहिवासी असलेला मयांक अंधेरी येथे सेल्समन म्हणून कार्यरत होता. लोकलच्या प्रथम श्रेणीच्या डब्यात प्रवास करत असताना, ट्रेनचा दरवाजा बंद करण्यावरून एका प्रवाशाशी त्याचा वाद झाला. हे शाब्दिक भांडण इतके विकोपाला गेले की, समोरच्या व्यक्तीने मयांकच्या पोटात चाकू खुपसला आणि आतड्या बाहेर काढल्या.
रेल्वे पोलिसांनी तातडीने घटनास्थळी धाव घेत जखमी मयांकला दवाखान्यात हलवले, मात्र त्यापूर्वीच त्याचा मृत्यू झाल्याचे डॉक्टरांनी जाहीर केले. कुटुंबीयांनी मोठा आक्रोश करत आरोपीला फाशीची शिक्षा देण्याची मागणी लावून धरली आहे.
