पुणे: पुणे जिल्ह्यातील गाजत असलेल्या केतन अग्रवाल हत्याकांडात दररोज नवे खुलासे समोर येत आहेत. सुरुवातीला हा अपघाती मृत्यू असल्याचे सांगितले जात होते. मात्र पोलिसांच्या तपासात हा घातपात असल्याचे समोर आले. याप्रकरणी केतनची होणारी पत्नी सिया गोयल आणि तिचा प्रियकर चेतन चौधरी यांना अटक करण्यात आली असून दोघेही सध्या पोलीस कोठडीत आहेत.
तपासादरम्यान आता लोहगड किल्ल्यावरील एका सुरक्षा रक्षकाने महत्त्वाची माहिती दिली आहे. 18 जून रोजी सिया गोयल आणि केतन अग्रवाल लोहगडावर गेले होते. त्यावेळी तिकीट काउंटरवर घडलेली एक घटना आता चर्चेचा विषय ठरली आहे.
सुरक्षा रक्षक धीरज जाधव यांनी सांगितले की, सिया आणि केतन तिकीट काढण्यासाठी काउंटरवर आले होते. मात्र ऑनलाइन पेमेंट करताना त्यांना मोबाईल नेटवर्कची अडचण येत होती. त्यामुळे ते काही वेळ तिथेच थांबले होते. त्यावेळी त्यांना पुढे नेटवर्क मिळाल्यावर तिकीट काढून दाखवण्याचा सल्ला देण्यात आला होता.
याच दरम्यान चेतन चौधरी देखील तिथे आला होता. त्याच्या कानात हेडफोन होते आणि त्याने डोक्यावर टोपी घातली होती. तो तिकीट न काढताच किल्ल्याकडे जात असल्याचे सुरक्षा रक्षकांच्या लक्षात आले. त्याला थांबवून विचारणा केल्यावर त्याने आपण व्यायामासाठी जात असल्याचे सांगितले आणि परतताना तिकीटाचे पैसे देतो, असे उत्तर दिले.
मात्र परतताना तो सुरक्षा कर्मचाऱ्यांना दिसलाच नाही. त्यामुळे त्याने मुद्दाम तिकीट काढणे टाळले होते का, असा प्रश्न उपस्थित होत आहे. पोलिसांच्या हाती कोणताही पुरावा लागू नये यासाठी हा प्रयत्न होता का, याचाही तपास सुरू आहे.
दरम्यान, पोलिसांकडून सिया गोयल आणि चेतन चौधरी यांची सखोल चौकशी सुरू असून या प्रकरणात आणखी धक्कादायक माहिती समोर येण्याची शक्यता व्यक्त केली जात आहे.
