छत्रपती संभाजीनगर: छत्रपती संभाजीनगरमधून एक धक्कादायक आणि माणुसकीला काळिमा फासणारी बातमी समोर आली आहे. आपल्या पत्नीचा सूड घेण्यासाठी एका पतीने अत्यंत घृणास्पद कृत्य करत तिला स्वतःच्या मित्राच्या, भावाच्या आणि घरमालकाच्या हवाली केल्याचा संतापजनक प्रकार उघडकीस आला आहे. पीडित विवाहितेने केलेल्या तक्रारीनुसार जवाहरनगर पोलीस ठाण्यात विविध कलमान्वये गुन्हा दाखल करण्यात आला असून, मुख्य संशयित शेख रिजवान शेख शब्बीर याला पोलिसांनी बेड्या ठोकल्या आहेत.
नेमकी घटना अशी की, पीडितेसोबत पतीने लग्नाआधी पळवून नेल्याप्रकरणी कायदेशीर कारवाई झाली होती. याच जुन्या रागाचा आणि बदनामीचा वचपा काढण्यासाठी पतीने लग्नानंतर पत्नीचा छळ सुरू केला. माहेरून 5 लाख रुपये आणण्यासाठी तिला त्रास दिला जात होता. दरम्यान, पतीनेच पत्नीचा संपर्क क्रमांक आपल्या मित्राला दिला. अभ्यासाच्या निमित्ताने ओळख वाढवल्यानंतर तिला एका हॉटेलमध्ये नेऊन तिच्यावर अत्याचार करण्यात आला आणि अश्लील व्हिडिओच्या माध्यमातून तिला धमकावण्यात आले.
सर्वात संतापजनक बाब म्हणजे, जेव्हा पीडितेने ही आपबीती पतीला सांगितली, तेव्हा त्याने तिचे म्हणणे ऐकून घेण्याऐवजी, “तो सांगेल तसे कर, मीच त्याला तुझ्याकडे पाठवले होते,” असे सांगून तिला पुन्हा अत्याचाराच्या खाईत ढकलले. यानंतर तिला पतीच्या भावाकडे आणि नंतर घरमालकाकडे सोपवून तिच्यावर वेळोवेळी गुंगीची औषधे देऊन अत्याचार करण्यात आले. तिचे अश्लील व्हिडिओ सोशल मीडियावर व्हायरल करण्याची धमकी देऊन तिला गप्प बसवण्यात येत होते.
पीडितेच्या आरोपानुसार, या संपूर्ण क्रूर खेळात तिच्या सासू-सासऱ्यांचाही पाठिंबा होता. अखेर या नर्कातून कशीबशी सुटका करून घेत तिने माहेर गाठले आणि घडलेला भयानक प्रकार आपल्या कुटुंबीयांना सांगितला. पोलिसांनी तातडीने पती, दीर, सासू, सासरा आणि अन्य संबंधित आरोपींविरुद्ध गुन्हा नोंदवला आहे. सध्या पोलीस उपनिरीक्षक अनुराधा पाटील या प्रकरणाचा सखोल तपास करत आहेत.
