पुणे: पुणे जिल्ह्यातील खेड तालुक्यातील वाकी खुर्द परिसरात एका केटरिंग व्यावसायिकाला दोन मुलींची छेड काढल्याचा खोटा आरोप करून त्याच्याकडून २ लाख रुपये उकळण्याचा प्रयत्न झाल्याचा धक्कादायक प्रकार समोर आला आहे. फिर्यादीचे अपहरण करून त्याला बेल्ट आणि हाताने मारहाण करण्यात आली. तसेच धारदार शस्त्राचा धाक दाखवत खंडणीची मागणी करण्यात आल्याप्रकरणी चाकण उत्तर पोलिसांनी चौघांना अटक केली आहे.
या प्रकरणी सनी वैजीनाथ उघडे (वय १९), अनिकेत पुरुषोत्तम ढोले (वय २१), रवी संतोष परघरमोल (वय १८) आणि प्रेम गिरीष अंकुश (वय २१) यांना पोलिसांनी अटक केली आहे.
पोलिसांनी दिलेल्या माहितीनुसार, आरोपींनी फिर्यादीला फोन करून दोन मुलींची छेड काढल्याचा आरोप केला. या प्रकरणात पोलिसात तक्रार होऊ नये, यासाठी २ लाख रुपये द्यावे लागतील, अशी धमकी त्यांनी दिली. मात्र फिर्यादीने पैसे देण्यास नकार दिल्यानंतर आरोपींनी त्याला जबरदस्तीने रिक्षात बसवून नेले.
त्यानंतर आरोपींनी फिर्यादीला बेल्ट व हाताने मारहाण केली. तसेच धारदार शस्त्राचा धाक दाखवून पैसे देण्यासाठी दबाव टाकला. एवढ्यावरच न थांबता त्यांनी फिर्यादीला त्याच्या केटरिंगच्या ग्राहकांकडे नेऊन पैसे आणण्यास भाग पाडल्याचा आरोप आहे.
फिर्यादीनुसार, आरोपींनी रोख ४५ हजार रुपये आणि ऑनलाइन व्यवहारातून १० हजार ९५० रुपये जबरदस्तीने उकळले. तसेच फिर्यादीची हिरो स्प्लेंडर प्लस दुचाकी ताब्यात घेऊन आणखी पैशांची मागणी केल्याचेही समोर आले आहे.
या प्रकरणी चाकण उत्तर पोलीस ठाण्यात अपहरण, खंडणी, मारहाण, धमकी आणि शस्त्र कायद्याअंतर्गत विविध कलमान्वये गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक कदम करत आहेत.
