पुणे: नाशिकमधील अशोक खरात प्रकरणानंतर राज्यात अंधश्रद्धेचे प्रकार पुन्हा समोर येऊ लागले आहेत. त्यातच आता पुणे जिल्ह्यातील खेड तालुक्यात आणखी एक धक्कादायक प्रकार उघड झाला आहे. खेड येथील मंदोशी परिसरात ‘चेडा’, ‘करणी’ आणि भूतबाधेची भीती दाखवत एका कुटुंबात फूट पाडण्याचा प्रयत्न झाल्याचा आरोप करण्यात आला आहे.
या प्रकरणात किसन तळपे आणि मंगेश कारोटे या दोन कथित भगतांवर गंभीर आरोप आहेत. दोघांनी संगनमताने कुटुंबीयांच्या मनात भीती निर्माण करून त्यांचा गैरफायदा घेण्याचा प्रयत्न केल्याचे सांगितले जात आहे.
समोर आलेल्या ऑडिओ रेकॉर्डिंगनुसार, “घरात चेडा आणून ठेवला आहे, जागरण करून तो कुटुंबात सामील करावा लागेल,” अशा भीतीदायक गोष्टी सांगून कुटुंबीयांना मानसिकदृष्ट्या त्रस्त करण्यात आले. तसेच घरासमोर थडगे असल्याचा बनाव करून अघोरी विधी करण्यास भाग पाडण्याचाही प्रयत्न झाला.
“एकाची पोळी भाजली जाईल, बाकीच्यांची करपून जाईल,” अशा विधानांतून कुटुंबात मतभेद निर्माण करण्याचा प्रयत्न करण्यात आला. यासोबतच तांदूळ, प्रसाद, अंगारा अशा गोष्टींचा वापर करून दैवी शक्तीचा खोटा आभास निर्माण करण्यात आला.
या प्रकारामुळे संबंधित कुटुंब मोठ्या मानसिक तणावाखाली आले आहे. सोशल मीडियावर ऑडिओ व्हायरल झाल्याने त्यांची बदनामीही झाल्याची तक्रार करण्यात आली आहे. या प्रकरणी खेड उपविभागीय पोलीस अधिकाऱ्यांकडे तक्रार दाखल करण्यात आली असून पुढील चौकशी सुरू आहे.
या घटनेमुळे अंधश्रद्धेचा प्रश्न पुन्हा एकदा ऐरणीवर आला आहे. अशा भोंदूंच्या विरोधात कठोर कारवाई करण्याची मागणी होत असून नागरिकांनीही सतर्क राहून अशा प्रकारांपासून दूर राहण्याचे आवाहन करण्यात येत आहे.
