बारामती, ता. 26 : बारामती शहर पोलीस ठाण्याच्या हद्दीत घडलेल्या गंभीर स्वरूपाच्या गुन्ह्यात पीडित “निर्भया” हिला न्याय मिळवून देण्यात बारामती पोलिसांनी उल्लेखनीय कामगिरी केली आहे. वेगवान तपास, पुराव्यांची शिस्तबद्ध मांडणी आणि न्यायालयीन प्रक्रियेत प्रभावी पाठपुरावा यामुळे आरोपीला अखेर 10 वर्षांची सश्रम शिक्षा ठोठावण्यात आली. आण्णा सुरेश ओव्हाळ (वय 43, रा. सरडे, ता. फलटण, जि. सातारा) असे 10 वर्षे सश्रम करावासाची शिक्षा सुनावण्यात आलेल्या आरोपीचे नाव आहे.
पोलिसांनी दिलेल्या माहितीनुसार, 14 जून 2024 रोजी आरोपी आण्णा सुरेश ओव्हाळ याने पीडितेवर जबरदस्तीने लैंगिक अत्याचार केला. पीडित महिलेने धैर्याने पुढे येत तक्रार नोंदवली आणि त्यानुसार गुन्हा भा.द.वि. कलम 376(2)(r) अन्वये तत्काळ दाखल करण्यात आला. पोलीस निरीक्षक संध्याराणी देशमुख यांनी तपासाची सूत्रे हातात घेत साक्षीदारांचे जबाब, वैद्यकीय अहवाल आणि तांत्रिक बाबींचे संकलन करून आरोपीविरुद्ध ठोस व विश्वासार्ह पुरावे न्यायालयासमोर सादर करण्यात आले.
सदर प्रकरणाची सुनावणी बी. डी. शेळके (जिल्हा व अतिरिक्त सत्र न्यायाधीश, बारामती) यांच्या न्यायालयात (सेशन केस नं. 163/2024) झाली असता, न्यायालयाने आरोपीस दोषी ठरवत भा.द.वि. कलम 376(2)(F) अंतर्गत 10 वर्षे सश्रम कारावास व 20 हजार रुपये दंड अशी कठोर शिक्षा सुनावली. सदर खटल्यात सरकारी अभियोक्ता कमलाकर एस. नवले यांनी प्रभावीपणे बाजू मांडली.
ही कारवाई पोलीस अधीक्षक संदीप सिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी सुदर्शन राठोड आणि प्रभारी पोलीस निरीक्षक श्रीशैल चिवडशेट्टी यांच्या मार्गदर्शनाखाली पार पडली. सेशन कोर्ट पैरवी अंमलदार पोलीस उपनिरीक्षक कसपटे, जिल्हा कोर्ट पैरवी अधिकारी पोलीस निरीक्षक संतोष घोळवे तसेच कोर्ट कर्मचारी आवटे व कोकरे यांनीही मोलाची भूमिका बजावली.
दरम्यान, बारामती शहर पोलिसांनी ठाम संदेश देत महिलांवरील अत्याचार सहन केला जाणार नाही. गुन्हेगारांना कठोर शिक्षा होईल व महिला, ज्येष्ठ नागरिकांच्या सुरक्षेबाबत बारामती पोलीसांची शून्य सहनशीलतेची भूमिका कायम राहील असा महत्वपूर्ण संदेश दिला आहे.
