Dairy Farm Bridge : पिंपरी : पिंपरी-चिंचवड शहरातील वाहतूक कोंडी कमी करण्यासाठी महत्त्वाचा ठरणारा डेअरी फार्म उड्डाणपूल आता पूर्णत्वाच्या टप्प्यात आला आहे. अनेक वर्षांपासून प्रतीक्षेत असलेल्या या प्रकल्पाचे काम सध्या वेगाने सुरू असून एप्रिल अखेरपर्यंत हा पूल वाहतुकीसाठी खुला करण्याचे नियोजन महापालिकेकडून करण्यात आले आहे.
या प्रकल्पातील सर्वात अवघड टप्पा असलेले रेल्वे मार्गावरील स्टील गर्डर बसवण्याचे काम सध्या सुरू आहे. यासाठी रेल्वे प्रशासनाशी समन्वय साधून विशेष ब्लॉक घेण्यात आला आहे. दररोज नियोजनबद्ध पद्धतीने गर्डर बसवून त्यांची जोडणी केली जात आहे. हे काम पूर्ण झाल्यानंतर स्लॅब टाकणे, डांबरीकरण आणि अंतिम कामे जलदगतीने पूर्ण केली जाणार आहेत.
पिंपळे सौदागर, रहाटणी आणि पिंपरी कॅम्प या भागांमधून पुणे-मुंबई महामार्गाकडे जाण्यासाठी डेअरी फार्म मार्ग महत्त्वाचा मानला जातो. मात्र, रेल्वे फाटकामुळे वाहनचालकांना मोठा वेळ थांबावे लागत होते. या उड्डाणपुलामुळे सुमारे 1290 मीटरचा प्रवास आता थांबा न घेता करता येणार आहे. त्यामुळे वाहनचालकांचा वेळ आणि इंधनाची बचत होणार असून वाहतूक कोंडीही कमी होण्यास मदत होईल.
या प्रकल्पाला 2023 मध्ये सुरुवात झाली होती. मात्र वृक्षतोड, विविध परवानग्या आणि रेल्वे विभागाच्या मंजुरीमुळे कामात काही अडथळे आले. तरीही महापालिकेच्या स्थापत्य विभागाने या अडचणींवर मात करत प्रकल्पाला गती दिली आहे.
एप्रिल अखेरपर्यंत हा पूल सुरू झाल्यास शहरातील वाहतूक व्यवस्था अधिक सुरळीत होण्याची अपेक्षा व्यक्त केली जात आहे. नागरिकांना यामुळे मोठा दिलासा मिळणार आहे.
