शिरूर: शिरूर तालुक्यातील सरदवाडी घाटातील राजस्थान ढाब्यासमोर घडलेल्या थरारक गोळीबार व खून प्रकरणाचा उलगडा करण्यात शिरूर पोलिसांना यश आले असून,या प्रकरणातील सात आरोपींना पोलिसांकडून अटक करण्यात आली आहे.अटक करण्यात आलेल्या आरोपींना न्यायालयासमोर हजर केले असता,न्यायालयाने ९ जून पर्यंत पोलीस कोठडी सुनावली आहे.
सोमवारी १ जून रोजी सायंकाळी साडेपाच वाजण्याच्या सुमारास न्हावरा फाटा ते न्हावरा रस्त्यावर सरदवाडी घाटात राजस्थान ढाब्यासमोर टोयोटा टायझर कारमधून प्रवास करणारे उमेश जगदाळे,केदार झाडगे आणि विशाल काळे या तिघांच्यावर अज्ञात हल्लेखोरांनी गोळीबार केला होता. किया सोनेट कार आणि दुचाकीवरून आलेल्या आरोपींनी चित्रपटाला साजेशी थरारक कारवाई करत टोयोटा कारला धडक दिल्यानंतर गोळीबार केला.त्यानंतर झालेल्या हल्ल्यात विशाल काळे याचा मृत्यू झाला होता, तर केदार झाडगे जखमी झाला होता.या घटनेमुळे संपूर्ण शिरूर तालुक्यात खळबळ उडाली होती.
या प्रकरणी शिरूर पोलीस स्टेशन येथे भारतीय हत्यार कायदा तसेच विविध कलमांच्याखाली गुन्हा दाखल करण्यात आला होता.त्यामुळे वरिष्ठ अधिकाऱ्यांच्या मार्गदर्शनाखाली विविध पथके तयार करून आरोपींचा शोध सुरू करण्यात आला.
तपासादरम्यान पोलिसांनी १)इशप्पा उर्फ विशाल जगन्नाथ पन्दी (वय २४, रा.वाघोली,ता.हवेली,जि.पुणे) २) अमन उर्फ मुन्ना दस्तगीर पटेल (वय २६, रा.बकोरी फाटा,गाडेवस्ती,वाघोली) ३) सिद्धार्थ उर्फ बाल्या तुकाराम शिंदे(वय २१,रा. बाबुरावनगर,शिरूर) ४)पांडुरंग बालाजी कांबळे (वय २६,रा.रामलिंग रोड,शिरूर) ५) आदित्य दीपक कांबळे(वय १९, रा.वाघोली,पुणे) ६) देवानंद शिवाजी चव्हाण (वय २७,रा.मारुती आळी,शिरूर, पुणे) आणि ७) अभिषेक उर्फ घ्या हनुमान मिसाळ (वय २५,रा.सोनार आळी, शिरूर, पुणे यांना अटक पोलिसांनी अटक केली आहे.
अटक केलेल्या सर्व आरोपींना न्यायालयासमोर हजर करण्यात आले असता,माननीय न्यायालयाने मंगळवार-९ जून २०२६ पर्यंत पोलीस कोठडी मंजूर केली आहे.या प्रकरणामागील नेमके कारण,कटाचा सूत्रधार,वापरण्यात आलेली शस्त्रे तसेच इतर फरार आरोपींचा सहभाग याबाबत शिरूर पोलीस सखोल तपास करीत आहेत.
शिरूर परिसरात घडलेल्या या खळबळजनक घटनेचा तपास वेगाने सुरू असून,आणखी काही महत्त्वाचे धागेदोरे हाती लागण्याची शक्यता पोलिस सूत्रांकडून व्यक्त करण्यात येत आहे.
