पुणे: गणेशोत्सवातील ध्वनीप्रदूषण आणि डीजेच्या मोठ्या आवाजाविरोधात भूमिका घेणारे सामाजिक कार्यकर्ते विद्यानंद बापट यांच्यावर हल्ला झाल्याने पुण्यात खळबळ उडाली आहे. टिळक रस्त्यावर ही घटना घडली. या प्रकरणात पुणे क्राईम ब्रँचने तत्काळ कारवाई करत अवघ्या 3 तासांत संतोष चव्हाण याला ताब्यात घेतले.
गणेशोत्सवात मोठ्या आवाजात डीजे वाजवण्याला बापट यांनी विरोध दर्शवला होता. उत्सवाच्या काळात ध्वनीप्रदूषण कमी करण्याची गरज असल्याचे ते सातत्याने सांगत होते. त्यांच्या याच भूमिकेमुळे त्यांना मारहाणही करण्यात आली.
या घटनेनंतर राजकीय वर्तुळातूनही प्रतिक्रिया उमटत आहेत. राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांनी बापट यांच्यावरील हल्ल्याचा निषेध केला. बापट यांच्याशी आपली वैयक्तिक ओळख नसली तरी त्यांनी मांडलेला मुद्दा योग्य असल्याचे पवार यांनी सांगितले.
सण आणि उत्सव हे लोकांना आनंद देणारे असावेत. मात्र, मोठ्या आवाजातील डीजे आणि रस्त्यांवरील कार्यक्रमांमुळे उत्सवाचे स्वरूप बदलत असल्याचे पवार यांनी नमूद केले. एखाद्या व्यक्तीने आपले मत मांडले म्हणून त्याच्यावर हल्ला करणे चुकीचे असून, अशा प्रकारांमुळे लोकशाहीच्या मूल्यांवर प्रश्न उपस्थित होतो, असे त्यांनी म्हटले.
पुणे पोलिसांनी अशा घटनांकडे अधिक गांभीर्याने पाहावे, अशी अपेक्षाही पवार यांनी व्यक्त केली. गरज भासल्यास डीजेच्या वापराबाबत कठोर नियम करण्याचा विचार करावा, असेही त्यांनी सांगितले. दरम्यान, खासदार सुप्रिया सुळे यांनीही या हल्ल्याचा निषेध केला आहे.
