लोणी काळभोर, ता. २२ : पुणे शहर, पुणे जिल्हा आणि पिंपरी-चिंचवड पोलीस आयुक्तालयाच्या हद्दीतून दोन वर्षांसाठी तडीपार करण्यात आलेल्या एका सराईत गुन्हेगाराने पुन्हा लोणी काळभोरमध्ये धुडगूस घातल्याचा धक्कादायक प्रकार समोर आला आहे. भररस्त्यात हातात लोखंडी कोयता घेऊन हवेत फिरवत नागरिकांमध्ये दहशत निर्माण करणाऱ्या गुन्हेगाराला लोणी काळभोर पोलिसांनी चित्रपटातील पाठलागाप्रमाणे कारवाई करत शिताफीने २० जूनला जेरबंद केले. पोलिसांच्या तत्परतेमुळे संभाव्य मोठा अनर्थ टळल्याची भावना नागरिकांनी व्यक्त केली आहे.
आरोपी रोहित महादेव पाटील (वय २२, रा. खोकलाई देवी चौक, ननवरे चाळ, लोणी काळभोर) असे अटक करण्यात आलेल्या गुन्हेगाराचे नाव आहे, याप्रकरणी पोलीस अंमलदार दिपक अर्जुन गायकवाड यांनी सरकारतर्फे लोणी काळभोर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, २० जून रोजी रात्री बिट मार्शल कर्तव्यावर असताना पोलिसांना गुप्त बातमीदारामार्फत माहिती मिळाली की, पाषाणकर गॅस एजन्सीजवळील सार्वजनिक रस्त्यावर एक तरुण हातात कोयता घेऊन नागरिकांना धमकावत आहे.
या घटनेची माहिती मिळताच पोलीस उपनिरीक्षक प्रल्हाद जगताप यांच्या नेतृत्वाखाली पथक घटनास्थळी दाखल झाले. पोलिसांनी घटनास्थळी पोहोचताच रोहित पाटील हा हातातील कोयता हवेत फिरवत परिसरात दहशत निर्माण करत असल्याचे दिसून आले. पोलिसांची चाहूल लागताच त्याने पळून जाण्याचा प्रयत्न केला. मात्र, पोलिसांनी तत्काळ पाठलाग करून काही अंतरावर त्याला पकडले.
चौकशीत आरोपी हा पुणे शहर, पुणे जिल्हा आणि पिंपरी-चिंचवड पोलीस आयुक्तालयाच्या हद्दीतून २३ ऑगस्ट २०२४ पासून दोन वर्षांसाठी तडीपार करण्यात आल्याचे उघड झाले. विशेष म्हणजे, तडीपार कालावधीत संबंधित हद्दीत प्रवेश करण्यासाठी कोणतीही अधिकृत परवानगी घेतलेली नसल्याची कबुली आरोपीने पोलिसांसमोर दिली. याप्रकरणी आरोपी रोहित पाटील याच्याविरुद्ध भारतीय हत्यार कायदा कलम ४(२५), महाराष्ट्र पोलीस कायदा कलम १४२, कलम ३७(१)(२)(३) सह १३५ तसेच क्रिमिनल लॉ अमेंडमेंट अॅक्टच्या कलम ३ व ७ अन्वये गुन्हा दाखल करण्यात आला आहे. पुढील तपास पोलीस हवालदार महेश करे करत आहेत.
