हैद्राबाद: दाक्षिणात्य सिनेसृष्टीचे सुपरस्टार आणि सध्या तमिळनाडूचे मुख्यमंत्री म्हणून कार्यरत असलेले थलापथी विजय आणि अभिनेत्री त्रिशा कृष्णन यांची जोडी नेहमीच चर्चेत असते. त्यांच्या कथित अफेअरच्या चर्चा चाहत्यांमध्ये सातत्याने रंगत असतात. मात्र, आता या मैत्रीमध्ये काहीतरी बिनसल्याची जोरदार चर्चा सोशल मीडियावर सुरू झाली आहे. या दोघांच्या नात्यातील वाढत्या दुराव्याने चाहत्यांना मोठा धक्का दिला आहे.
नुकताच २२ जून रोजी विजय यांचा ५२ वा वाढदिवस झाला. दरवर्षी विजय यांच्या वाढदिवसाला मनापासून शुभेच्छा देणाऱ्या त्रिशाने यंदा मात्र पूर्णपणे मौन पाळले. तसेच त्रिशाने विजय यांना चक्क इन्स्टाग्रामवरून ‘अनफॉलो’ केल्याचे समोर आले आहे. या घटनेचे स्क्रीनशॉट्स व्हायरल झाल्यानंतर, या दोघांमध्ये नक्की काय झाले असावे, या प्रश्नावर चर्चांना उधाण आले आहे.
काही काळापूर्वी विजय आणि त्यांच्या पत्नी संगीता यांच्यातील वैवाहिक वादामुळे साऊथ सिनेसृष्टीत खळबळ उडाली होती. त्या वेळीही अनेक अफवांमध्ये त्रिशाचे नाव जोडले गेले होते, ज्यावर या कलाकारांनी कधीही प्रतिक्रिया दिली नाही. मात्र, त्यानंतरही विजय यांच्या शपथविधी सोहळ्याला त्रिशाची उपस्थिती आणि तिने व्यक्त केलेला आनंद पाहता, सर्व काही ठीक असल्याचे वाटत होते. मात्र, त्यानंतर अचानक आलेल्या या दुराव्याने साऊथ फिल्म इंडस्ट्रीत तर्कवितर्कांना वेग आला आहे.
त्रिशाने अचानक असे पाऊल का उचलले, याबद्दल अद्याप विजय किंवा त्रिशा यांच्याकडून अधिकृत माहिती मिळालेली नाही.
