पुणे, ता. १३ : डोंगरावर फिरण्यासाठी प्रवेश नाकारल्याचा राग मनात धरून सात जणांच्या टोळक्याने वॉचमनवर दगड, लाकडी दांडका आणि प्लास्टिकच्या पाण्याच्या जारने जीवघेणा हल्ला केल्याची धक्कादायक घटना घडली आहे. हि घटना वाघोली येथील तिवारी प्रॉपर्टीजच्या साइटवर रविवारी (१२ जुलै) दुपारी तीन वाजण्याच्या सुमारास घडली आहे. या हल्ल्यात वॉचमन गंभीर जखमी झाला असून, हल्लेखोरांनी “पोलिसांना नाव सांगितले तर याद राख” अशी धमकी देत घटनास्थळावरून पळ काढला.
साहील भालेकर, इम्रान जावेद शेख, ओम भालेकर, मोन्या पांचाळ, दादया धनवटे, ‘जित्या’ आणि आणखी एका अनोळखी अशी गुन्हा दाखल करण्यात आलेल्यांची नावे आहेत. याप्रकरणी संदीप रामेश्वर यादव (वय ३४) यांनी वाघोली पोलीस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी यादव हे वाघोलीतील भावडी चार परिसरात राहतात आणि विवेक तिवारी यांच्या तिवारी प्रॉपर्टीज साइटवर वॉचमन म्हणून काम करतात. त्यांच्या तक्रारीनुसार, काही दिवसांपूर्वी इम्रान जावेद शेख व त्याच्या मित्रांना साइटवरील डोंगरावर फिरण्यासाठी जाण्यास मज्जाव केल्याने दोन्ही पक्षांत वाद झाला होता.
संदीप यादव साइटवरील बॅरिकेटजवळ ड्युटीवर असताना मुख्य प्रवेशद्वारावर असलेल्या सहकारी वॉचमनने त्यांना बोलावून घेतले. त्याचवेळी साहील भालेकर, इम्रान जावेद शेख, ओम भालेकर, मोन्या पांचाळ, दादया धनवटे, ‘जित्या’ आणि आणखी एका अनोळखी व्यक्तीने तेथे येत जुन्या वादाचा राग काढत शिवीगाळ सुरू केली.
यानंतर टोळक्याने संदीप यादव यांच्यावर तुफान हल्ला चढवला. आरोपींनी दगड, लाकडी दांडका आणि प्लास्टिकच्या पाण्याच्या जारने बेदम मारहाण केली. या हल्ल्यात त्यांच्या डोक्याला गंभीर दुखापत झाली. परिस्थिती गंभीर झाल्याने इतर दोन वॉचमन घटनास्थळावरून जीव वाचवण्यासाठी पळून गेले. मारहाणीनंतर आरोपींनी “पोलिसांत तक्रार केली तर परिणाम भोगावे लागतील” अशी धमकी देत तेथून पलायन केले. या प्रकरणी संदीप यादव यांनी संबंधित सात जणांविरुद्ध वाघोली पोलिसांकडे तक्रार दाखल केली असून, पोलिसांनी गुन्हा नोंद करून पुढील तपास सुरू केला आहे.
