Lok Sabha Election 2024: आज लोकसभा निवडणूक(Loksabha Election 2024) च्या तिसऱ्या टप्प्यासाठी मतदान(3rd Phase Voting Day) होत आहे. मतदार आपला हक्क बजावण्यासाठी आणि योग्य उमेदवार निवडून आणण्यासाठी कडक उन्हाचा विचार न करता मतदान केंद्रावर मतदानासाठी गर्दी करत आहेत. त्यात अशावेळी महाडमध्ये मतदानासाठी निघालेल्या मतदाराचा मृत्यू झाला आहे. मृत मतदाराचे नाव प्रकाश चिनकटे असे आहे. ते महाड तालुक्यातील दाभेकर कोंड किंजळोली येथील रहिवासी होते.
यावेळी घटनेसंदर्भात मिळालेल्या माहितीनुसार, मतदान करण्यासाठी प्रकाश चिनकटे हे सकाळी घराबाहेर पडले होते. मतदान केंद्र पोहोचणार त्या आधीच अवघ्या १०० मीटर अंतरावर असताना चिनकटे हे रस्त्यावरच कोसळले. हे पाहून नागरिकांनी त्यांना उपचारासाठी रुग्णालयात दाखल केले. मात्र उपचारापूर्वीच त्यांचा मृत्यू झाला होता. त्यामुळे गावात शोककळा पसरली आहे.
रायगड जिल्ह्यात तापमानाचा पारा चांगलाच वाढला आहे. सकाळी आठ नंतरच उन्हाच्या तीव्र झळा जानवू लागतात. त्यामुळे नागरिक दुपारी घराबाहेर पडणे टाळतात. त्यामुळे नागरिकांना मतदानापूर्वी योग्य ती तयारी करून घराबाहेर पडावे. सैल आणि सुती कपडे घालावे. ज्याने घाम आला तरी त्याचा त्रास होणार नाही. याची दक्षता घेतली पाहिजे.
