पुणे, ता.7 : पुण्यातील विमाननगर परिसरातील नामांकित अॅटलान्टिस रूफ टॉप लाऊंज हॉटेलमध्ये बेकायदेशीररित्या सुरू असलेल्या हुक्का पार्लरवर गुन्हे शाखेच्या अंमली पदार्थ विरोधी पथकाने धडक कारवाई करत मोठा भांडाफोड केला आहे. या कारवाईत तब्बल 1 लाख 47 हजार 550 रुपयांचा हुक्का साहित्य, विदेशी दारू व रोख रक्कम जप्त करण्यात आली असून, सात जणांना ताब्यात घेण्यात आले आहे.
पोलिसांनी दिलेल्या माहितीनुसार, अवैध धंद्यांविरोधात सुरू असलेल्या कॉम्बिंग ऑपरेशन दरम्यान अंमली पदार्थ विरोधी पथक २ ला गुप्त माहिती मिळाली होती की, विमाननगरमधील या हॉटेलमध्ये विनापरवाना हुक्का पार्लर चालवला जात आहे. यानुसार पोलिसांनी सापळा रचत हॉटेलवर अचानक छापा टाकला. या छाप्यात स्वप्निल तांबे, अमेय अजमीरे, नवरंग कोल्हे, अमितकुमार गोयल, कमसल लष्कर, शिवम यादव आणि माहरुफ आलम हे आरोपी बेकायदेशीररीत्या हुक्का बार चालवत असल्याचे उघड झाले. तसेच परवानगीशिवाय विदेशी दारूचा साठा ठेवून विक्री केली जात असल्याचाही धक्कादायक प्रकार समोर आला.
दरम्यान, पोलिसांनी घटनास्थळावरून हुक्का पॉट, फ्लेवर्ड तंबाखू साहित्य, विदेशी दारूच्या बाटल्या आणि रोख रक्कम असा मोठा मुद्देमाल जप्त केला. याप्रकरणी विमानतळ पोलीस ठाण्यात सिगारेट व तंबाखूजन्य उत्पादने (महाराष्ट्र सुधारणा) अधिनियम २०१८ तसेच महाराष्ट्र दारूबंदी कायद्यान्वये गुन्हा दाखल करण्यात आला आहे.
ही कारवाई पुणे शहर पोलीस आयुक्त अमितेश कुमार, सह पोलीस आयुक्त रंजनकुमार शर्मा, अपर पोलीस आयुक्त (गुन्हे) पंकज देशमुख, पोलीस उप-आयुक्त निखिल पिंगळे, सहाय्यक पोलीस आयुक्त शंकर खटक यांच्या मार्गदर्शनाखाली अंमली पदार्थ विरोधी पथक दोनचे वरिष्ठ पोलीस निरीक्षक पंडीत रेजितवाड, सहाय्यक पोलीस निरीक्षक नितीन नाईक, सहाय्यक फौजदार शेख, पोलीस हवालदार प्रशांत कळसकर, पांडुळे, देवकाते, चव्हाण, सोनवणे, पोलीस अंमलदार बास्टेवाड व महिला पोलीस माकडी यांच्या पथकाने केली आहे.
