पुणे: सोशल मीडियाच्या माध्यमातून पाकिस्तानस्थित गुन्हेगारी नेटवर्कशी काही स्थानिक तरुणांचा संपर्क आल्याचा संशय व्यक्त होत असताना, पुणे जिल्ह्यात मंगळवारी राज्य दहशतवादविरोधी पथक (ATS) आणि स्थानिक पोलिसांनी मोठी संयुक्त कारवाई केली. पुणे, पिंपरी-चिंचवड आणि जिल्ह्यातील विविध भागांमध्ये एकाच वेळी तब्बल 66 ठिकाणी छापे टाकण्यात आले. या कारवाईत 50 संशयितांना ताब्यात घेण्यात आले असून, त्यापैकी 23 जणांची कसून चौकशी सुरू असल्याची माहिती तपास यंत्रणांनी दिली आहे.
या तपासादरम्यान धक्कादायक बाब समोर आली आहे. चौकशीतील एका संशयिताच्या बँक खात्यात थेट पाकिस्तानातून मोठ्या प्रमाणात पैसे जमा झाल्याचे प्राथमिक तपासात उघड झाले आहे. बेरोजगार तरुणांना आर्थिक प्रलोभने दाखवून त्यांचा वापर संशयास्पद आणि देशविरोधी कारवायांसाठी करण्याचा प्रयत्न होत असल्याचा संशय तपास यंत्रणांनी व्यक्त केला आहे. या प्रकरणाशी संबंधित मोबाईल फोन, लॅपटॉप आणि इतर डिजिटल उपकरणे जप्त करण्यात आली असून, त्यांचे फॉरेन्सिक आणि तांत्रिक विश्लेषण सुरू आहे.
दरम्यान, पिंपरी-चिंचवडमधील पाच तरुणांनी पाकिस्तानी गँगस्टर शहजाद भट्टी याचे व्हिडिओ आणि पोस्ट ‘लाईक’ केल्यामुळे त्यांना एटीएसच्या चौकशीला सामोरे जावे लागले. प्राथमिक तपासात त्यांचा देशविरोधी कारवायांशी थेट संबंध आढळलेला नसला, तरी भविष्यात अशा संशयास्पद ऑनलाइन हालचालींपासून दूर राहण्याचा इशारा पोलिसांनी दिला आहे.
सुमारे 22 विशेष पथकांच्या सहभागातून ही मोहीम राबवण्यात आली. चार दिवसांपूर्वी जवळपास 200 संशयितांची चौकशी करून मिळालेल्या माहितीच्या आधारे ही कारवाई करण्यात आली असून अधिक तपास सुरु आहे.
