लोणी काळभोर, ता. २८ : नायगाव फाटा येथून बेपत्ता झालेल्या १६ वर्षीय अल्पवयीन मुलाच्या प्रकरणाला आता धक्कादायक वळण मिळाले आहे. बेपत्ता होण्यापूर्वी संबंधित मुलाला कुंजीरवाडी (ता. हवेली) ग्रामपंचायत हद्दीतील थेऊर फाटा परिसरातील एका हार्डवेअर दुकानात अमानुषपणे बेदम मारहाण करण्यात आल्याचा धक्कादायक प्रकार समोर आला असून, या मारहाणीचा व्हिडिओ ‘पुणे प्राईम न्यूज’च्या हाती लागला आहे. या व्हिडिओमध्ये अल्पवयीन मुलगा जीवाच्या आकांताने ओरडत असतानाही हार्डवेअर चालक त्याला काठीने आणि लाथाबुक्क्यांनी मारहाण करत असल्याचे स्पष्ट दिसत असल्याने परिसरात संतापाची लाट उसळली आहे.
पियुष संदीप शिंदे (वय १६ वर्षे १० महिने) असे बेपत्ता झालेल्या मुलाचे नाव आहे. विशेष म्हणजे, हा मुलगा मागील सहा दिवसांपासून बेपत्ता असून, त्याच्या अपहरणाचा गुन्हा उरुळी कांचन पोलीस ठाण्यात दाखल करण्यात आला आहे. मात्र, त्याआधी त्याच्यावर झालेल्या मारहाणीच्या घटनेने संपूर्ण प्रकरण संशयाच्या भोवऱ्यात अडकले आहे.
मिळालेल्या माहितीनुसार, पियुष शिंदे हा दोन महिन्यांपूर्वी थेऊर फाटा येथील एका राजस्थानी व्यक्तीच्या हार्डवेअर दुकानात काम करत होता. नंतर त्याने ते काम सोडले होते. काही दिवसांपूर्वी तो पुन्हा परिसरात दिसल्यानंतर संबंधित हार्डवेअर चालकाने त्याला दुकानात बोलावून घेतले. दुकानातील गोमातेसाठी ठेवलेल्या दोन दानपेट्यांमधील रोकड चोरी केल्याचा संशय घेत त्याच्यावर चौकशीच्या नावाखाली अमानुष अत्याचार करण्यात आल्याचे समोर आले आहे.
व्हिडिओ पाहण्यासाठी खाली दिलेल्या इंस्टाच्या पोस्टवर क्लिक करा :
View this post on Instagram
व्हिडिओमध्ये संबंधित अल्पवयीन मुलगा “मी चोरी केली नाही” असे सांगत विनवण्या करताना दिसत आहे. मात्र, तरीही हार्डवेअर चालक त्याला निर्दयीपणे मारहाण करत असल्याचे स्पष्ट दिसत आहे. यामुळे “कायदा हातात घेण्याचा अधिकार या व्यक्तीला कोणी दिला?” असा संतप्त सवाल नागरिकांकडून उपस्थित केला जात आहे.
सर्वात धक्कादायक बाब म्हणजे, जर खरंच चोरीचा संशय होता तर संबंधित हार्डवेअर चालकाने थेट पोलीस ठाण्यात तक्रार का दिली नाही? पोलिसांऐवजी स्वतःच न्यायालय बनून अल्पवयीन मुलाला बेदम मारहाण करण्यामागे नेमका उद्देश काय होता? तसेच या गंभीर प्रकारानंतरही पोलिसांनी तत्काळ गुन्हा दाखल करून कठोर कारवाई का केली नाही? असा प्रश्नही आता उपस्थित होत आहे.
दरम्यान, पियुष शिंदे याच्या वडिलांनी उरुळी कांचन पोलीस ठाण्यात दिलेल्या तक्रारीनुसार, मुलाच्या डोक्यावर जुन्या जखमेची खूण असल्याचे नमूद केले आहे. त्यामुळे व्हिडिओतील मारहाणीमध्येच त्याला गंभीर दुखापत झाली असण्याची शक्यता व्यक्त केली जात आहे. विशेष म्हणजे, मारहाणीच्या घटनेनंतरच पियुष बेपत्ता झाल्याने या दोन्ही घटनांचा परस्पर संबंध असू शकतो, अशी जोरदार चर्चा नागरिकांमध्ये सुरू झाली आहे.
अल्पवयीन मुलगा सहा दिवसांपासून बेपत्ता असताना पोलीस प्रशासनाने अद्याप ठोस तपासाची दिशा का घेतली नाही? हार्डवेअर चालकाची सखोल चौकशी झाली का? व्हिडिओ समोर आल्यानंतरही आरोपींवर कठोर कारवाई होणार का? असे अनेक सवाल आता उपस्थित होत आहेत. या प्रकरणाची निष्पक्ष चौकशी करून संबंधित हार्डवेअर चालकावर कठोर कारवाई करण्यात यावी, तसेच बेपत्ता मुलाचा तातडीने शोध लावावा, अशी मागणी नागरिकांकडून जोर धरू लागली आहे.
