पुणे : वाकड परिसरात कौटुंबिक वादातून पतीने पत्नीवर जीवघेणा हल्ला केल्याची धक्कादायक घटना समोर आली आहे. पत्नीने जवळ येण्यास नकार दिल्याच्या रागातून आरोपीने तिचा गळा दाबून चाकूने हल्ला केल्याचा आरोप आहे. आईला वाचवण्यासाठी मध्ये पडलेल्या मुलीलाही या हल्ल्यात दुखापत झाली. या घटनेनंतर परिसरात संताप व्यक्त होत आहे.
मिळालेल्या माहितीनुसार, 11 ऑगस्ट रोजी रात्री सुमारे 10 वाजण्याच्या सुमारास 30 वर्षीय महिला घरातील स्वयंपाकघरात दूध गरम करत होती. तिची कंबर दुखत असल्याने ती औषध घेत होती. त्याचवेळी तिचा 35 वर्षीय पती तेथे आला आणि तिला सोबत येण्यास सांगितले.
मात्र, घरातील मुले जागी असल्याचे सांगत तसेच कंबरदुखीचा त्रास असल्यामुळे पत्नीने नकार दिला. या नकारामुळे पती संतापला. यापूर्वीही तो पत्नीच्या चारित्र्यावर संशय घेत असल्याचे तक्रारीत नमूद करण्यात आले आहे. रागाच्या भरात त्याने पत्नीला धमकावत तिचा गळा दोन्ही हातांनी दाबल्याचा आरोप आहे.
यानंतर आरोपीने स्वयंपाकघरातील भाजी कापण्याचा चाकू आणला आणि पत्नीवर वार केले. या हल्ल्यात महिलेच्या कमरेला गंभीर दुखापत झाली. दरम्यान, आईवर हल्ला होत असल्याचे पाहून तिची मुलगी अंजली आईला वाचवण्यासाठी मध्ये आली. मुलीने भांडण थांबवण्याचा प्रयत्न केला. मात्र, संतापलेल्या आरोपीने तिच्यावरही चाकूने वार केल्याने ती जखमी झाली. जखमी पत्नीवर सध्या रुग्णालयात उपचार सुरू आहेत. पीडित महिलेने दिलेल्या तक्रारीवरून वाकड पोलीस ठाण्यात तिच्या 35 वर्षीय पतीविरोधात गुन्हा दाखल करण्यात आला आहे.
