Pune News: पुणे : पुणे रेल्वे स्थानकावर प्रवाशांसाठी लवकरच आधुनिक स्लिपिंग पॉड्सची सुविधा सुरू होणार आहे. रेल्वे प्रशासनाने प्रवाशांच्या सोयीसाठी हा उपक्रम हाती घेतला असून यासाठी सुमारे 36 लाख रुपये खर्च करण्यात आला आहे. आरक्षण केंद्राजवळील एक्झिक्युटिव्ह लाउंजमध्ये ही व्यवस्था करण्यात आली आहे. रेल्वेला उशीर झाल्यास किंवा प्रवाशांना काही काळ विश्रांती घ्यायची असल्यास या सुविधेचा उपयोग होणार आहे.
अनेकदा रेल्वे गाड्यांना विलंब होतो किंवा प्रवाशांना पुढील प्रवासासाठी काही तास थांबावे लागते. अशा वेळी स्थानकावर बसण्यासाठीही जागा मिळणे कठीण होते. त्यामुळे प्रवाशांना त्रास सहन करावा लागतो. काही प्रवासी जवळच्या हॉटेलमध्ये थांबण्याचा पर्याय निवडतात, मात्र अल्प वेळासाठी हॉटेलमध्ये राहणे अनेकांना महाग पडते. या पार्श्वभूमीवर पुणे रेल्वे स्थानकावर स्लिपिंग पॉड्सची सुविधा सुरू करण्याचा निर्णय घेण्यात आला आहे.
या पॉड्सची रचना जपानमधील पॉड हॉटेलच्या संकल्पनेवर आधारित आहे. यात लहान पण आरामदायी आणि वातानुकूलित बेडची व्यवस्था असते. मोठी खोली घेण्याऐवजी प्रवासी फक्त बेडसाठी भाडे देतात, त्यामुळे अल्प मुक्कामासाठी हा पर्याय सोयीचा ठरतो. पुणे रेल्वे स्थानकावर सध्या 24 स्लिपिंग पॉड्स तयार करण्यात आले आहेत.
रेल्वे विभागाच्या माहितीनुसार, ही सुविधा तासांनुसार भाड्याने दिली जाईल. प्रवासी जितका वेळ वापर करतील तितकेच शुल्क आकारले जाईल. येत्या काही दिवसांत ही सुविधा सुरू होणार असून त्यामुळे प्रवाशांना स्थानकावरच कमी खर्चात आराम करण्याची सोय उपलब्ध होणार आहे.
