पुणे: जर तुम्ही अद्याप तुमच्या गॅस (Pune News) कनेक्शनचे ‘केवायसी’ (KYC) पूर्ण केले नसेल, तर आजच करा. गॅस कंपन्या आणि वितरकांच्या ताज्या निर्णयानुसार, ज्या ग्राहकांचे केवायसी प्रलंबित आहे, त्यांचे गॅस बुकिंग आता थेट नाकारले जाणार आहे. इतकेच नव्हे, तर दोन सिलिंडरमधील अंतराबाबतही नवा नियम लागू करण्यात आला असून, यामुळे सर्वसामान्यांच्या स्वयंपाकघराचे बजेट आणि नियोजन कोलमडण्याची शक्यता आहे.
इंडियन ऑईल, भारत पेट्रोलियम आणि हिंदुस्थान पेट्रोलियम यांसारख्या प्रमुख कंपन्यांनी आता कठोर पाऊल उचलले आहे. केवायसी पूर्ण नसल्यास ऑनलाइन किंवा ऑफलाइन, कोणतेही बुकिंग स्वीकारले जाणार नाही. यापूर्वी दोन सिलिंडर घेण्यामध्ये 21 दिवसांचे अंतर ठेवावे लागत होते. आता ही मर्यादा वाढवून 30 दिवस करण्यात आली आहे. म्हणजेच, एकदा सिलिंडर घेतल्यावर पुढील महिनाभर तुम्हाला नवीन बुकिंग करता येणार नाही.
जागतिक स्तरावर इस्रायल-इराण युद्धामुळे कच्च्या तेलाची आणि एलपीजीची पुरवठा साखळी विस्कळीत झाली आहे. इंधनाचा साठा मर्यादित असल्याने त्याचा अपव्यय रोखण्यासाठी हा निर्णय घेण्यात आला आहे.
