पुणे: सणासुदीचा काळ म्हणजे खरेदीचा हंगामच असतो. यंदा पुणेकरांनी दसरा (Dussehra) ते दिवाळी (Diwali) दरम्यान वाहन खरेदीत असा उत्साह दाखवला की, आरटीओ (RTO Pune) मध्ये नवा रेकॉर्डच झाला आहे. 1 ते 17 ऑक्टोबर या कालावधीत तब्बल 13,187 नवीन वाहनांची नोंदणी झाली आहे.
दुचाकींचा बाजार सर्वात आघाडीवर असून तब्बल 7,991 दुचाकींची नोंद झाली असून, गेल्या वर्षीच्या तुलनेत ही वाढ तब्बल 928 वाहनांनी अधिक आहे. चारचाकी (Four Wheelers) खरेदीही कमी नसून 3,992 गाड्यांची नोंद झाली आहे.
आरटीओ अधिकाऱ्यांच्या माहितीनुसार, कंपन्यांकडून मिळणाऱ्या सवलती आणि काही वाहनांवरील सरकारी ऑफर्स यामुळे ग्राहकांना खरेदीसाठी प्रोत्साहन मिळाले. याशिवाय GST कपातीचा फायदा ग्राहकांना थेट झाला असून, वाहन खरेदी अधिक परवडणारी ठरली आहे.
गेल्या वर्षीच्या तुलनेत यंदा सुमारे 12.94% वाढ नोंदवली गेली आहे. म्हणजेच सणांच्या काळात पुणेकरांनी तब्बल 1,552 अधिक वाहने खरेदी केली आहेत. या वाढीमुळे ऑटोमोबाइल क्षेत्रात चैतन्य निर्माण झाले आहे.
मात्र, सर्वच विभागांत वाढ झाली नाही. टॅक्सी आणि मालवाहतूक वाहनांच्या नोंदीत घट झाली आहे. एकंदरीत, पुण्याचा ऑटो मार्केट सध्या तेजीत असून, दसरा ते दिवाळी या सणांच्या काळात पुणेकरांनी ‘खरेदीचा आनंद’ खऱ्या अर्थाने अनुभवला आहे.
