पुणे: नॅशनल डिफेन्स अकादमीच्या (NDA) 149 व्या कोर्सच्या (Pune News) पासिंग आऊट परेडच्या वृत्तांकनासाठी गेलेल्या पत्रकार आणि छायाचित्रकारांना एनडीएच्या अधिकाऱ्यांकडून अत्यंत वाईट वागणूक मिळाली. या प्रकारामुळे संताप व्यक्त करत पत्रकारांनी कार्यक्रमावर बहिष्कार टाकला.
पत्रकार संघाच्या म्हणण्यानुसार, सकाळी कार्यक्रमाला सुरुवात झाल्यानंतर, काही अधिकाऱ्यांनी अचानक पत्रकारांसाठी निश्चित केलेल्या जागा बदलल्या. पत्रकारांना अशा ठिकाणी बसण्यास सांगण्यात आले जिथून परेडचे फोटो काढणे, व्हिडिओ शूट करणे किंवा नौदलप्रमुख अॅडमिरल दिनेश त्रिपाठी यांचे भाषण छायाचित्रण व व्हिडिओ रेकॉर्डिंग करणे शक्यच नव्हते.
उद्धटपणे बोलून अपमान केला
दरम्यान, आसन व्यवस्थेवर जेव्हा पत्रकारांनी आक्षेप घेतला, तेव्हा अधिकाऱ्यांनी ‘बसायचे असेल तर बसा, नाहीतर जाऊ शकता,’ असे उत्तर दिले. तसेच ‘मागच्या वेळेस तुमच्यामुळे कार्यक्रम फ्लॉप झाला होता’ असे बोलून पत्रकारांचा अपमान केला. या वागणुकीमुळे पत्रकारांनी कार्यक्रमावर बहिष्कार टाकावा लागला.
पत्रकार संघाने सांगितले की, पुणे शहरातील प्रसारमाध्यमे गेल्या अनेक वर्षांपासून NDA च्या कार्यक्रमांचे वृत्तांकन करत आहेत आणि त्यांचे यश लोकांपर्यंत पोहोचवत आहेत. दरम्यान, यापूर्वी कधीच पत्रकारांसोबत असा व्यवहार करण्यात आला नव्हता. पत्रकार संघाने या संपूर्ण प्रकरणाची सखोल चौकशी करण्याची मागणी केली आहे.
