राहुलकुमार अवचट
यवत, ता. 10 : यवत (Pune News) पोलीस ठाण्याच्या हद्दीतील बोरीऐंदी (ता. दौंड) हद्दीतून पोलिसांनी तब्बल 28 लाख रुपयांचा अवैध गुटखा ताब्यात घेतला आहे. याप्रकरणी एकावर विविध कलमान्वये यवत पोलीस ठाण्यात गुन्हा दाखल करण्यात आला आहे. ही कारवाई गुरुवारी (ता. 09) सायंकाळच्या दरम्यान करण्यात आली आहे.
नवनाथ रतन झुरुंगे (रा. झुरुंगे वस्ती, बोरीऐंदी ता. दौंड), असे गुन्हा दाखल करण्यात आलेल्या आरोपीचे नाव आहे. त्याच्या घराच्या परिसरात असलेल्या शेडमधून आर. एम. डी. पान मसाला व तंबाखुचे बॉक्स, डायरेक्टर पान मसाला व शॉट 999 तंबाखु, विमल पान मसाला व तंबाखुचे बॉक्स हा मुद्देमाल जप्त करण्यात आला आहे. याप्रकरणी हवालदार मोहम्मद अली मड्डी यांनी फिर्याद दिली आहे.
पोलिसांनी दिलेल्या माहितीनुसार, आरोपी नवनाथ रतन झुरुंगे हा झुरुंगे वस्ती, बोरीऐंदी परिसरात राहतो. तसेच घराशेजारी एक पत्र्याचे शेड आहे. या शेडमध्ये आरोपी नवनाथ झुरुंगे याने पान मसाला व इतर साहित्य असा 27 लाख 97 हजार 624 रुपयांचा अवैध गुटखा साठवून ठेवला होता.
पोलिसांना माहिती मिळताच पोलीस पथकाने सदर ठिकाणी छापा टाकून 28 लाख रुपये किंमतीचा गुटखा जप्त केला आहे. याप्रकरणी गुटखा व तंबाखूजन्य पदार्थांवरील बंदीचे उल्लंघन केल्याप्रकरणी नवनाथ झुरुंगे याच्यावर गुन्हा दाखल करण्यात आला आहे. या कारवाईमुळे परिसरातील अवैध गुटखा व्यापारावर आळा बसण्याची शक्यता व्यक्त केली जात आहे.
दरम्यान, गुट़खा सेवन केल्यामुळे मुखाच्या कर्करोगासारखे आजार होवुन शारीरिक हानी होवुन जीव धोक्यात येत असल्याने आरोपीने भारतीय न्याय संहिताच्या विविध कलमान्वये व अन्न सुरक्षा व मानक कायदा सन 2006 चे कलमाचे उत्लंघन केले आहे. त्यामुळे आरोपीवर गुन्हा दाखल कारण्यात आला आहे. ही कारवाई यवतचे पोलिस निरीक्षक नारायण देशमुख यांच्या मार्गदर्शनाखाली करण्यात आली असून पुढील तपास पोलीस उपनिरीक्षक विजय कोल्हे करीत आहेत.
