पुणे: परदेशात चांगल्या पगाराची नोकरी मिळवून देण्याचे आमिष दाखवून एका 28 वर्षीय महिलेला पोर्तुगालमध्ये नेऊन विकल्याचा धक्कादायक प्रकार समोर आला आहे. नागपूरमधील या महिलेने तब्बल महिनाभर छळ सहन केल्यानंतर स्वतःची सुटका करून घेत भारतात परत येत पोलिसांकडे तक्रार दाखल केली. या प्रकरणामुळे परदेशात नोकरीच्या शोधात असलेल्या तरुणींच्या सुरक्षेचा प्रश्न पुन्हा ऐरणीवर आला आहे.
पोलिसांच्या तपासानुसार, संबंधित महिला नोकरीच्या शोधात होती. डिसेंबर 2025 मध्ये तिला Instagram वर पुण्यातील विमाननगर भागातील ‘वी मायग्रेट’ या कन्सल्टन्सीची माहिती मिळाली. संपर्क साधल्यानंतर तिला पोर्तुगालमध्ये कॅशिअरची नोकरी देण्याचे सांगण्यात आले. दरमहा सुमारे दीड लाख रुपये पगार आणि दिवसाला 8 तास काम असल्याचे आमिष तिला दाखवण्यात आले.
नोकरी मिळण्याच्या आशेने महिलेने आरोपींना वेगवेगळ्या टप्प्यांत तब्बल 11 लाख रुपये दिले. मात्र, पोर्तुगालमध्ये पोहोचल्यानंतर परिस्थिती पूर्णपणे बदलली. आरोपानुसार, तिला एका बिअर शॉपच्या मालकाकडे सोपवण्यात आले. तेथे तिच्या इच्छेविरुद्ध काम करण्यासाठी दबाव आणण्यात आला.
महिलेने विरोध केल्यानंतर संबंधित व्यक्तीने तिला भारतातील एजंट्सना पैसे देऊन आणल्याचे सांगितल्याचा दावा तिने तक्रारीत केला आहे. यानंतर तिने पतीशी संपर्क साधून आपली फसवणूक झाल्याची माहिती दिली. पतीच्या सल्ल्यानंतर तिने तेथून बाहेर पडण्याचा मार्ग शोधला आणि महिनाभराचा त्रास सहन केल्यानंतर भारतात परतली.
पुण्यात आल्यानंतर तिने गुन्हे शाखेशी संपर्क साधला. तिच्या तक्रारीवरून पुणे विमानतळ पोलीस ठाण्यात 8 आरोपींविरोधात गुन्हा दाखल करण्यात आला आहे. प्रतिभा भाटी, अनिलकुमार, अजहर शेख, वामसी, चैतन्य, हिम्मत सिंग आणि कपिल मिश्रा यांच्यासह इतर आरोपींची नावे तपासात समोर आली आहेत.
परदेशात नोकरीचे आमिष दाखवून तरुण-तरुणींची फसवणूक करून मानवी तस्करी करणारे मोठे रॅकेट कार्यरत असल्याचा संशय पोलिसांना आहे. दरम्यान, या प्रकरणाचा अधिक तपास केला जात आहे.
