पुणे: महाराष्ट्राच्या राजकारणातील ‘किंगमेकर’ राहिलेले दिवंगत नेते अजित पवार (Pune News) यांच्या निधनाला काही दिवस उलटले असले, तरी त्यांच्या वारशावरून आणि आठवणी जतन करण्यावरून आता पवार कुटुंबात मतभिन्नता समोर येत आहे. अजितदादांचे स्मारक आणि संग्रहालय कुठे असावे, यावरून पार्थ आणि जय पवार यांच्यात दोन वेगवेगळे प्रवाह पाहायला मिळत आहेत.

बारामती की पुणे? वादाचा केंद्रबिंदू
अजित पवार यांचे २८ जानेवारी रोजी विमान अपघातात निधन झाले. त्यांच्या स्मरणार्थ एक भव्य स्मारक आणि संग्रहालय उभारण्याचा निर्णय ‘विद्या प्रतिष्ठान’ने घेतला आहे. मात्र, हे स्मारक नेमके कुठे असावे? यावर कुटुंबात एकमत होताना दिसत नाही.
-
जय पवार यांची भूमिका: जय पवार यांचा असा आग्रह आहे की, अजितदादांचे स्मारक बारामतीत असावे, परंतु त्यांचे संग्रहालय पुणे शहरात असावे. दादांचे पुणे शहरावर आणि जिल्ह्यावर जीवापाड प्रेम होते, हे त्यामागचे मुख्य कारण जय यांनी सांगितले आहे.
-
पार्थ पवार यांची भूमिका: पार्थ पवार हे मात्र स्मारक आणि संग्रहालय दोन्ही एकाच ठिकाणी, म्हणजेच बारामतीत असावे या मतावर ठाम आहेत. बारामती ही दादांची कर्मभूमी असल्याने तिथेच सर्व काही असणे चांगले ठरेल, असा त्यांचा तर्क आहे.
अजितदादांचे कार्य बारामती आणि पुणे अशा दोन्ही ठिकाणी विस्तारलेले असल्याने जय आणि पार्थ यांचे दावे आपापल्या जागी महत्त्वाचे वाटतात. एकीकडे पार्थ पवारांना दादांची कर्मभूमी असलेली बारामती महत्त्वाची वाटते, तर दुसरीकडे जय पवारांना पुण्याच्या विकासातील दादांचा वाटा अधोरेखित करायचा आहे. कुटुंबातील या मतभिन्नतेवर आता सुनेत्रा पवार आणि ज्येष्ठ नेते शरद पवार काय मध्यमार्ग काढतात, याकडे सर्वांचे लक्ष लागले आहे.








