शिरूर: दुबईतील नामांकित कंपनीत नोकरी लावून देण्याचे आमिष दाखवून इंस्टाग्रामच्या माध्यमातून तरुणांची फसवणूक केल्याचा गंभीर प्रकार रांजणगाव गणपती परिसरात उघडकीस आला आहे. या प्रकरणात प्रत्येकी 10 हजार रुपये घेऊन 43 तरुण व 17 तरुणींना येथील सुखकर्ता लॉन्स येथे डांबून ठेवण्यात आल्याचे निष्पन्न झाले आहे. (Pune Crime)
नोकरीसाठी बोलावून घेतल्यानंतर संबंधित तरुण-तरुणींना बाहेर जाण्यास मज्जाव करण्यात येत असल्याची माहिती मिळताच शिवसेना जिल्हाप्रमुख बापूसाहेब शिंदे यांनी तातडीने हस्तक्षेप केला. त्यांच्या पुढाकाराने व पोलिसांच्या मदतीने एकूण 60 तरुणांची सुखरूप सुटका करण्यात आली.
या प्रकरणी कलिम अवद बिनबाद व ज्ञानेश्वर धायदडक या दोघांना पोलिसांनी ताब्यात घेतले असून, त्यांच्याकडून पुढील चौकशी सुरू आहे. फसवणुकीसाठी सोशल मीडियाचा वापर करून तरुणांना जाळ्यात ओढल्याचा संशय पोलिसांकडून व्यक्त होत असून, आणखी काही आरोपी या प्रकरणात सहभागी असण्याची शक्यता पोलिसांकडून व्यक्त करण्यात आली आहे.
दरम्यान, सुटका करण्यात आलेल्या तरुण-तरुणींनी नोकरीच्या आशेने पैसे दिल्याचे सांगितले असून, अशा प्रकारच्या फसवणुकीमुळे परिसरात एकच खळबळ उडाली आहे. पोलिसांकडून या प्रकरणी गुन्हा दाखल करण्याची प्रक्रिया सुरू असून, तरुणांनी सोशल मीडियावरील नोकरीच्या जाहिरातींबाबत सतर्क राहण्याचे आवाहन करण्यात आले आहे.
