Pune News : बारा ज्योतिर्लिंगांपैकी एक असलेल्या श्रीक्षेत्र भीमाशंकर मंदिरात एक धक्कादायक प्रकार घडला आहे. शिवसेना शिंदे गटाचे पुणे उत्तर जिल्हाप्रमुख देविदास दरेकर यांनी मंदिरातील एका पुजाऱ्याला मारहाण केल्याचा प्रकार समोर आला आहे. या घटनेमुळे परिसरात मोठी खळबळ उडाली आहे. विशेष म्हणजे हा सगळा प्रकार सीसीटीव्ही कॅमेऱ्यात कैद झाला आहे. मात्र मारहाण झालेल्या पुजाऱ्याने अद्याप कोणतीही पोलीस तक्रार दाखल केलेली नाही.
भीमाशंकर मंदिरात नेहमीच भाविकांची मोठी गर्दी असते. मुख्य गाभारा लहान असल्यामुळे अभिषेक सुरू असताना दर्शनासाठी जागा फारच कमी उरते. त्यामुळे तासन्तास रांगेत उभे राहिलेले भाविक गर्दीत धक्के खात दर्शन घेतात. अभिषेकाच्या वेळेत अशा तणावाच्या परिस्थिती अनेकदा पाहायला मिळतात.
घटनेच्या दिवशीही मंदिरात अभिषेक सुरू होता आणि आरती चालू होती. याच वेळी देविदास दरेकर हे आपल्या सहकाऱ्यांसह दर्शनासाठी गाभाऱ्यात गेले. त्यांनी अभिषेक करणाऱ्या भाविकांच्या मागे उभं राहणं केलं. गाभाऱ्यात प्रचंड गर्दी होत असल्याने, त्या वेळचे पुजारी योगेश शिर्के यांनी दरेकर यांना दर्शन घेऊन बाहेर जाण्याची विनंती केली.
मात्र दरेकर यांनीही शिवलिंगाची पूजा करून पाणी घालायची इच्छा व्यक्त केली. याच मुद्द्यावरून दोघांमध्ये आधी वाद झाला आणि त्याचे रूपांतर बाचाबाचीत झाले. आरोप आहे की गाभाऱ्यातच दरेकर यांनी पुजाऱ्याला शिवीगाळ केली. त्यानंतर मंदिराबाहेर आल्यानंतर पुजारी योगेश शिर्के यांना मारहाण करण्यात आली. इतर पुजाऱ्यांनी मध्ये पडत वाद शांत केला.
या घटनेचा व्हिडिओ सीसीटीव्हीत स्पष्टपणे कैद झाला असूनही, संबंधित पुजाऱ्याने अद्याप पोलिसांत तक्रार दिलेली नाही. दुसरीकडे, मारहाण प्रकरणावर देविदास दरेकर यांनी लवकरच पत्रकार परिषद घेणार असल्याचं सांगितलं आहे. भीमाशंकर मंदिरातील काही पुजाऱ्यांची आरेरावी आणि दर्शनाच्या नावाखाली सुरू असलेला कथित भ्रष्टाचार आपण जनतेसमोर आणणार असल्याचा दावा त्यांनी केला आहे.
