छत्रपती संभाजीनगर : छत्रपती संभाजीनगर शहरातील मुकुंदवाडी रेल्वे स्टेशन परिसरात एका 28 वर्षांच्या महिलेने आपल्या अवघ्या 4 वर्षांच्या मुलासह धावत्या रेल्वेसमोर उडी मारून जीवन संपवले. नांदेडवरून मुंबईकडे जाणाऱ्या तपोवन एक्स्प्रेससमोर हे टोकाचे पाऊल उचलण्यात आले. रेल्वेच्या जोरदार धडकेत माय-लेकाचा जागीच मृत्यू झाला.
या घटनेची माहिती मिळताच मुकुंदवाडी पोलीस ठाण्याचे अधिकारी व कर्मचारी त्वरित घटनास्थळी दाखल झाले. त्यांनी पंचनामा करून मृतदेह ताब्यात घेतले असून पुढील कायदेशीर प्रक्रिया सुरू केली आहे. मात्र, मृत महिला आणि तिच्या मुलाची ओळख अद्याप पटू शकलेली नाही. पोलीस सध्या त्यांची ओळख पटवण्याचे काम करत आहेत.
महिलेने एवढे भयानक पाऊल का उचलले, याचे कारण अजून समोर आलेले नाही. कौटुंबिक कलह, मानसिक ताण किंवा आर्थिक विवंचना यांपैकी कोणत्या कारणामुळे हा प्रकार घडला, या दिशेने पोलीस सर्व बाजूंनी तपास करत आहेत.
अलीकडच्या काळात धाराशिव येथील नळदुर्ग किल्ला आणि खवड्या डोंगर परिसरात घडलेल्या दुर्दैवी घटना ताज्या असतानाच, छत्रपती संभाजीनगरमधील या दुर्दैवी घटनेमुळे संपूर्ण परिसरात मोठी खळबळ उडाली असून नागरिकांमधून तीव्र हळहळ व्यक्त केली जात आहे. मुकुंदवाडी पोलिसांचा पुढील तपास सुरू असून, पोलीस तपासानंतरच या घटनेमागील सत्य समोर येऊ शकेल.
