पुणे : पुण्यात पुन्हा एकदा अंगावर काटा आणणारा अपघाताचा व्हिडिओ समोर आला आहे. जिल्ह्यातील निघोजेमध्ये अज्ञात वाहनाने गर्भवती महिलेला पाठीमागून जोरात धडक देऊन जखमी केल्याची घटना घडली आहे. श्रद्धा सागर येळवंडे असे जखमी झालेल्या गर्भवती महिलेचे नाव आहे. श्रद्धा येळवंडे या गर्भवती असून त्यांचं बाळ सुखरूप असल्याची माहिती पोलिसांनी दिली आहे. अज्ञात वाहन चालकाचा महाळुंगे पोलीस शोध घेत आहेत.
हा अपघात शनिवारी ८ जून रोजी सायंकाळी पाच वाजण्याच्या सुमारास घडला आहे. या घटनेचा व्हिडिओ सध्या प्रचंड व्हायरल होत असून सादर महिला ही फुटबॉलसारखी उडाल्याचं या व्हिडिओमध्ये दिसत आहे.
View this post on Instagram
महाळुंगे पोलिसांनी दिलेल्या माहितीनुसार, शनिवारी सायंकाळी पाच वाजण्याच्या सुमारास देहू- निघोजे रस्त्यावर बालिंगवस्ती या ठिकाणी श्रद्धा येळवंडे या रस्त्याच्या कडेने डाव्या बाजूने चालत होत्या. त्यावेळी भरधाव वेगातील स्विफ्ट कारने पाठीमागून जोरात धडक दिली. या धडकेत श्रद्धा येळवंडे जखमी झाल्या असून त्यांना तातडीने रुग्णालयात दाखल करण्यात आले आहे.
दरम्यान, धडक दिल्यानंतर कार चालक न थांबताच त्या ठिकाणाहून पळून गेला आहे. याप्रकरणी म्हाळुंगे पोलीस ठाण्यात अज्ञात वाहनचालकाविरोधात गुन्हा दाखल करण्यात आला असून वाहन चालकाचा पोलीस शोध घेत आहेत.
