पुणे : भारत – पाकिस्तान तणावामुळे भारतातील 32 विमानतळावरील अनेक विमानांची उड्डाणे रद्द करण्यात आली आहेत. विमानतळावर विशेष लक्ष केंद्रित केले जात असतानाच शनिवारी रात्री पुणे विमानतळावर अचानक मॉकड्रिल करण्यात आली. रात्री 8.25 ते 8.45 या दरम्यान हा सराव पार पडला. त्यामुळे जवळपास 20 मिनिटं वीज पुरवठा खंडित झाला. त्यामुळे प्रवाशांमध्येही गोंधळाचे वातावरण निर्माण झालं.
या मॉकड्रिलदरम्यान विमानतळ प्रशासनाने अनेक महत्त्वाची पावले उचलली आहेत. विमान कंपन्या, हवाई वाहतूक नियंत्रण विभाग आणि इतर संबंधित संस्थांना याची पूर्वसूचना देण्यात आली होती. कर्मचाऱ्यांना देखील ही ड्रिल कशा पद्धतीने पार पाडली जाईल याची सविस्तर माहिती देण्यात आली होती. मात्र अचानक करण्यात आलेल्या ब्लॅकआउटमुळे प्रवाशांमध्ये गोंधळाचे वातावरण निर्माण झालं होतं. मात्र त्यानंतर प्रशासनाने या संदर्भातील घोषणा केल्यानंतर प्रवाशांनी सहकार्य केले.
दरम्यान प्रवाशांच्या मॉकड्रिल असल्याचे लक्षात येताच प्रवाशांनी विमानतळ प्रशासनाला सहकार्य केलं तसेच चाचणी यशस्वी होताच पुन्हा विमानतळावरील वीज पुरवठा सुरू करण्यात आला.
