दौंड, ता. ३० : पुणे-सोलापूर महामार्गावरील वाखारी (ता. दौंड) येथील धनश्री लॉजवर यवत पोलिसांनी पुन्हा एकदा नुधावरी (ता.२९) मध्यरात्री धडक कारवाई करत कथित देहव्यापार रॅकेटचा पर्दाफाश केला. या कारवाईत लॉज चालकाला अटक करण्यात आली असून विविध राज्यांतील सात महिलांची सुटका करण्यात आली आहे. आरोपीविरुद्ध स्त्रिया व मुली अनैतिक व्यापार (प्रतिबंध) अधिनियम, १९५६ अंतर्गत गुन्हा दाखल करण्यात आला आहे.
विनयकुमार रविंद्र हेगडे (वय ४०, मूळ रा. उडपी, कर्नाटक) असे अटक करण्यात आलेल्या आरोपीचे नाव आहे. याप्रकरणी पोलीस हवालदार महेंद्र संभाजी चांदणे यांनी सरकारच्या वतीने यवत पोलीस ठाण्यात फिर्याद दिली आहे. सलग दुसऱ्यांदा झालेल्या या धडक कारवाईमुळे पुणे-सोलापूर महामार्गालगत सुरू असलेल्या कथित अनैतिक व्यवसायांवर मोठा आघात झाल्याची चर्चा परिसरात रंगली आहे.
यवत पोलीस ठाण्याचे पोलीस निरीक्षक संतोष तासगांवकर यांनी दिलेल्या माहितीनुसार, वाखारी (ता. दौंड) गावच्या हद्दीतील धनश्री लॉजमध्ये महिलांकडून देहव्यापार सुरू असल्याची माहिती पोलिसांना एका खबऱ्यामार्फत मिळाली होती. त्यानुसार परि. पोलीस उपअधीक्षक भूषण माने यांच्या मार्गदर्शनाखाली विशेष पथक तयार करण्यात आले. पोलिसांनी दोन पंचांच्या उपस्थितीत बनावट ग्राहकाच्या माध्यमातून सापळा रचला.
बनावट ग्राहकाने लॉजमध्ये जाऊन महिलेची मागणी करत एक हजार रुपये दिल्यानंतर पूर्वनियोजित इशारा दिला. त्यानंतर पोलिसांनी तत्काळ लॉजवर धाड टाकून संपूर्ण परिसर ताब्यात घेतला. या छाप्यात विनयकुमार हेगडे हा लॉज चालक महिलांकडून अनैतिक देहव्यापार करून घेत असल्याचे प्राथमिक तपासात समोर आले. चौकशीत एका ग्राहकाकडून एक हजार रुपये घेऊन त्यापैकी पाचशे रुपये महिलेला आणि उर्वरित पाचशे रुपये स्वतः ठेवत असल्याची माहिती आरोपीने दिल्याचे पोलिसांनी सांगितले.
या कारवाईदरम्यान विविध राज्यांतील सात महिलांची सुटका करण्यात आली. तसेच बनावट ग्राहकाकडून देण्यात आलेली एक हजार रुपयांची रक्कम आणि कंडोम पाकिटे असा मुद्देमाल पोलिसांनी जप्त केला. या प्रकरणी आरोपी विनयकुमार रविंद्र हेगडे याच्याविरुद्ध स्त्रिया व मुली अनैतिक व्यापार (प्रतिबंध) अधिनियम, १९५६ च्या कलम ४ व ५ अन्वये गुन्हा दाखल करण्यात आला आहे. पुढील तपास सहाय्यक पोलीस निरीक्षक गाढवे करत आहेत.
दोन महिन्यांत दुसऱ्यांदा कारवाई
विशेष म्हणजे, १८ मे रोजीही यवत पोलिसांनी याच धनश्री लॉजवर छापा टाकून १० पीडित महिलांची सुटका केली होती. त्या कारवाईत प्रदीप बाबू पुजारी (मूळ रा. उडपी, कर्नाटक) आणि शहबाज सिराज सय्यद (रा. वरवंड, ता. दौंड) यांना अटक करण्यात आली होती. त्यानंतर पुन्हा त्याच लॉजवर देहव्यापार सुरू असल्याचे समोर आल्याने पोलिसांच्या कारवाईनंतरही हा अवैध व्यवसाय पुन्हा कसा सुरू झाला, याबाबत प्रश्न उपस्थित होत आहेत.
