पुणे: पुणे जिल्ह्यातील शिक्रापूर परिसरात झुडपात पोत्यात भरलेला तरुणाचा मृतदेह आढळल्याच्या घटनेचा पोलिसांनी अवघ्या काही तासांत छडा लावला. शिक्रापूर पोलिस आणि स्थानिक गुन्हे शाखेच्या (एलसीबी) संयुक्त तपासातून हा खून असल्याचे स्पष्ट झाले असून, या प्रकरणी एका दाम्पत्याला अटक करण्यात आली आहे.
24 ते 26 जुलैदरम्यान करंजेनगर परिसरातील मोकळ्या मैदानात झुडपात पोत्यात भरलेला मृतदेह आढळल्यानंतर पोलिसांसमोर सर्वात मोठे आव्हान मृताची ओळख पटवण्याचे होते. घटनास्थळाची पाहणी करून पोलिसांनी पुरावे गोळा केले. त्याचबरोबर मृतदेहाची ओळख पटवण्यासाठी सोशल मीडियाच्या माध्यमातून छायाचित्रे प्रसारित करण्यात आली आणि गुप्त बातमीदारांचे जाळेही सक्रिय करण्यात आले. या तपासातून मृत तरुणाची ओळख गौरव उर्फ अक्षय अशोक वायकर (वय 24, मूळ रा. थेऊर) अशी पटली.
तपासाचा वेग वाढवत पोलिसांनी गौरवच्या हालचालींची माहिती घेतली असता तो करंजेनगर येथे मुकेश विठ्ठल सोनवणे आणि त्याची पत्नी जान्हवी पाटोळे यांच्यासोबत राहत असल्याचे समोर आले. चौकशीदरम्यान गेल्या काही दिवसांपासून त्यांच्यात वाद सुरू असल्याची माहिती मिळाल्यानंतर पोलिसांनी दोघांना ताब्यात घेऊन सखोल चौकशी केली.
चौकशीदरम्यान आरोपींनी गुन्ह्याची कबुली दिली. अनैतिक संबंधाच्या संशयातून मुकेश सोनवणे याने गौरवचा गळा दाबून खून केल्याचे उघड झाले. त्यानंतर पुरावा नष्ट करण्याच्या उद्देशाने पत्नी जान्हवी हिने मृतदेह पोत्यात भरून निर्जन झुडपात टाकण्यासाठी मदत केल्याचेही तपासात निष्पन्न झाले.
मृत तरुणाची आई कांचन अशोक वायकर यांच्या फिर्यादीवरून शिक्रापूर पोलीस ठाण्यात खुनाचा गुन्हा दाखल करण्यात आला आहे. पोलिसांनी दोन्ही आरोपींना अटक केली असून, हत्येमागील नेमके कारण, घटनाक्रम आणि इतर पुरावे तपासून प्रकरणाचा अधिक तपास सुरू आहे.
