बारामती: बारामती तालुक्यातील वंजारवाडी परिसरात असलेल्या अमृता लॉज (सोमनाथ हॉटेल) येथे सुरू असलेल्या अवैध वेश्या व्यवसायावर पोलिसांनी मोठी कारवाई करत दोन आरोपींना अटक केली आहे, तर 5 महिलांची सुटका करण्यात आली आहे. 14 एप्रिल 2026 रोजी पहाटे सुमारे 3 वाजण्याच्या सुमारास मिळालेल्या खात्रीशीर माहितीनुसार ही धाड टाकण्यात आली.
या कारवाईत चंद्रशेखर यादव आणि रामहरी भोसले यांच्या पथकाने बोगस ग्राहकाच्या मदतीने सापळा रचला. पंचांसमक्ष नियोजनपूर्वक लॉजवर छापा टाकण्यात आला. तपासादरम्यान विविध खोल्यांमध्ये महिला आणि ग्राहक आढळून आले. चौकशीत आरोपी बाहेरून महिलांना आणून त्यांना ग्राहकांना पुरवत असल्याचे उघड झाले.
या प्रकरणात अजित जयसीन शेट्टी (वय 38) आणि चाँद कलाम आलम (वय 20) यांना अटक करण्यात आली आहे. या दोघांनी संगनमताने महिलांना पैशांचे आमिष दाखवून देहव्यवसाय चालविल्याचे समोर आले आहे.
छाप्यात पश्चिम बंगाल येथील 3 आणि भिवंडी, मुंबई येथील 2 अशा एकूण 5 महिलांची सुटका करण्यात आली असून त्यांना सुधारगृहात पाठवण्यात आले आहे. कारवाईदरम्यान पोलिसांनी रोख रक्कम, मोबाईल फोन, कंडोम पाकिटे आणि ग्राहकांची नोंद असलेले रजिस्टर असा सुमारे 17800 रुपयांचा मुद्देमाल जप्त केला आहे.
या प्रकरणी बारामती तालुका पोलीस ठाण्यात गुन्हा दाखल करण्यात आला असून पुढील तपास सुरू आहे. ही कारवाई संदीप गिल, गणेश बिरादार आणि सुदर्शन राठोड यांच्या मार्गदर्शनाखाली पार पडली. तसेच पोलीस अंमलदार संतोष कांबळे, केदारनाथ बिडवे, नितीन ढवाण, राजू बनणे, निलेश वाकळे, विठ्ठल तरंगे आणि स्मिता गायकवाड यांनी या कारवाईत सहभाग घेतला.
