पुणे: बुधवार पेठ परिसरात पुणे पोलिसांनी बुधवारी मध्यरात्री व्यापक कॉम्बिंग ऑपरेशन राबवत संपूर्ण परिसराची झाडाझडती घेतली. रात्री 12 ते पहाटे 3 वाजेपर्यंत सुरू असलेल्या या कारवाईदरम्यान 50 हून अधिक घरांची तपासणी करण्यात आली तसेच प्रमुख रस्त्यांवर कडेकोट नाकाबंदी करण्यात आली.

शुक्रवार पेठ पोलीस चौकी हद्दीतील कुंटणखान्यांमध्ये महिला पोलिसांच्या पथकाने महिलांची सविस्तर चौकशी केली. वेश्याव्यवसायासाठी आलेल्या काही ग्राहकांना ताब्यात घेऊन त्यांची पडताळणी करण्यात आली. अमली पदार्थांचा वापर, अल्पवयीन मुलींना जबरदस्तीने देहविक्रीत ढकलण्याचे प्रकार आणि बेकायदेशीररीत्या वास्तव्यास असलेल्या बांगलादेशी नागरिकांचा मुद्दा या कारवाईचा केंद्रबिंदू होता.
मिळालेल्या माहितीनुसार, बुधवार पेठेतील वेश्यावस्तीमध्ये बेकायदा वास्तव्य करणाऱ्या एका बांगलादेशी तरुणीप्रकरणी कारवाई न केल्याच्या आरोपावरून फरासखाना पोलीस ठाण्यातील एका महिला कर्मचाऱ्याला यापूर्वी निलंबित करण्यात आले होते. वरिष्ठ अधिकाऱ्यांना माहिती न देणे आणि आर्थिक व्यवहार केल्याचा ठपका तिच्यावर ठेवण्यात आला आहे.

या पार्श्वभूमीवर वरिष्ठ अधिकाऱ्यांच्या आदेशानुसार मोठा पोलिस बंदोबस्त तैनात करून ही धडक मोहीम हाती घेण्यात आली. परिसरातील सर्व प्रमुख मार्गांवर नाकाबंदी करत ये-जा करणाऱ्या संशयितांची तपासणी करण्यात आली. कारवाईनंतरही परिसरात पोलिसांची गस्त वाढविण्यात आली असून पुढील तपास सुरू आहे.






