Maharashtra Farmer Suicide: मुंबई : राज्यातील शेतकरी आत्महत्यांचे वाढते प्रमाण लक्षात घेता महाराष्ट्र सरकारने महत्त्वाचा निर्णय घेत स्वतंत्र शेतकरी आत्महत्या प्रतिबंध टास्क फोर्स (Farmer Suicide Prevention Task Force) स्थापन केला आहे. कृषी आयुक्त सुरज मांढरे यांनी परिपत्रकाद्वारे याची माहिती दिली. शेतकऱ्यांच्या समस्या केवळ आर्थिक नाहीत, तर मानसिक, सामाजिक आणि हवामान बदलाशी संबंधितही आहेत. या सर्व बाबींचा एकत्रित विचार करून उपाययोजना करण्याचा या कृती दलाचा उद्देश आहे. अशा प्रकारची स्वतंत्र यंत्रणा उभारणारे महाराष्ट्र हे देशातील पहिले राज्य ठरले आहे.

या टास्क फोर्सचे नेतृत्व विस्तार व प्रशिक्षण विभागाचे संचालक रफिक नाईकवाडी करणार आहेत. त्यांच्या अध्यक्षतेखाली सुनील बोरकर, उदय देशमुख, गणेश घोरपडे, जीवन सुंदे, नंदकिशोर नाईनवाड, सत्यनित शितोळे आणि सोनाली शिळकर या अधिकाऱ्यांचा समावेश आहे. विविध विभागांमध्ये समन्वय साधून काम करण्याची जबाबदारी या समितीवर सोपवण्यात आली आहे.
या कृती दलात मानसिक आरोग्य क्षेत्रातील तज्ज्ञांचाही सहभाग आहे. शिवार फाऊंडेशनमार्फत संशोधन करणारे कृषी समाजशास्त्रज्ञ डॉ. विनायक हेगाणा तसेच महिला शेतकऱ्यांच्या मानसिक आरोग्यावर काम करणाऱ्या मानसोपचारतज्ज्ञ डॉ. सुष्टी डोईजड यांची विशेष सदस्य म्हणून नियुक्ती करण्यात आली आहे. त्यामुळे या उपक्रमाला मानवी दृष्टिकोनासोबत तज्ज्ञ मार्गदर्शन मिळणार आहे.

राज्यात विविध शेतकरी कल्याणकारी योजना राबवल्या जात असल्या तरी हवामान बदल, पिकांचे नुकसान, वाढता खर्च, कर्जाचा ताण आणि बाजारातील चढउतार यामुळे शेतकरी अडचणीत येत आहेत. या पार्श्वभूमीवर आपत्तीपूर्व, आपत्तीच्या काळात आणि त्यानंतरही शेतकऱ्यांना मदत देण्याचा आराखडा तयार केला जाणार आहे.
कृषी आयुक्तांनी स्पष्ट केले की, शेतकरी आत्महत्येचा प्रश्न केवळ आर्थिक मदतीपुरता मर्यादित नाही. शेतकऱ्यांना आधीच सक्षम करणे, त्यांचे उत्पन्न वाढवणे आणि मानसिक आधार देणे यावर भर दिला जाणार आहे.






