लोणी काळभोर : पुणे – सोलापूर महामार्गावरील कुंजीरवाडी चौकात दुभाजकावरून वळण घेत असलेल्या चारचाकी पिकअपला आयशर टेम्पोने जोरदार धडक दिल्याची घटना घडली आहे. मंगळवारी (ता. 16) पहाटे अडीच वाजण्याच्या सुमारास ही घटना घडली आहे.
या घटनेत पिकअप पलटी झाले असून पिकअप चालकाला गंभीर दुखापत झाली आहे. तर आयशर टेम्पोचेही नुकसान झाले आहे. जखमी झालेल्या चालकाचे अद्याप नाव समजू शकले नाही.
मिळालेल्या माहितीनुसार, सोलापूर कडून पुण्याच्या बाजूकडे भरधाव आयशर टेम्पो निघाला होता. यावेळी कुंजीरवाडी चौकातून एक तेलाचे पिकअप रस्ता दुभाजकावरून कुंजीरवाडी कडे जाणाऱ्या रस्त्याकडे वळण घेत होता.
यावेळी अचानक महामार्गावर पिकअप आल्याने चालकाचे टेम्पोवरील नियंत्रण सुटले व भरधाव टेम्पोने पाठीमागून पिकअपला जोरदार धडक दिली. या धडकेत पिकअप रस्त्याच्या मध्यभागी पलटी झाले. यावेळी रस्त्याच्या दोन्ही बाजूला वाहन चालकांनी अपघात पाहण्यासाठी मोठी गर्दी केली होती.
दरम्यान, उरुळी कांचन येथील कदम रुग्णवाहिकेचे वैभव कदम व त्या ठिकाणी असलेल्या काही नागरिकांच्या मदतीने पिकअप चालकाला एका खाजगी रुग्णालयात दाखल करण्यात आले आहे. सदर घटनेची माहिती लोणी काळभोर पोलिसांना दिली असून पुढील कार्यवाही सुरु आहे.
