उत्तर प्रदेश: उत्तर प्रदेशातील मुजफ्फरनगर येथील जिल्हा रुग्णालयातून एक धक्कादायक बातमी समोर आली आहे. लिव्हरच्या गंभीर आजारावर उपचार घेत असलेल्या ४८ वर्षीय रमेश पाल यांचा मृत्यू झाला. विशेष म्हणजे, हा मृत्यू नैसर्गिक नसून रुग्णालयाच्या आयसीयू (ICU) विभागात दुसऱ्या एका रुग्णाच्या मुलाने केलेल्या हिंसक मारहाणीमुळे झाल्याचे स्पष्ट झाले आहे. या घटनेने रुग्णालयातील सुरक्षा व्यवस्थेवर गंभीर प्रश्नचिन्ह निर्माण केले आहे.
मिळालेल्या माहितीनुसार, रमेश पाल यांची प्रकृती चिंताजनक असल्याने त्यांना आयसीयू वॉर्डमध्ये ठेवण्यात आले होते. त्याच वॉर्डमध्ये कमला देवी नावाच्या एक वृद्ध महिला उपचार घेत होत्या. सोमवारी रात्री कमला देवी यांचा मुलगा संजय याच्यासोबत रमेश पाल यांचा काही कारणावरून वाद झाला. हा वाद इतका वाढला की, संजयने चक्क आयसीयूमध्येच रमेश पाल यांना बेदम मारहाण केली.
या मारहाणीत रमेश पाल यांच्या नाकावर गंभीर जखम झाली. नाकातून होणारा रक्तस्त्राव आणि अचानक खालावलेली प्रकृती यामुळे त्यांना तातडीने आपत्कालीन विभागात हलवण्यात आले. मात्र, उपचारादरम्यान मंगळवारी सकाळी त्यांची प्राणज्योत मालवली. या घटनेनंतर रुग्णालयात प्रचंड खळबळ उडाली आहे.
तक्रारीनुसार, कोतवाली नगर पोलीस ठाण्यात आरोपी संजयच्या विरोधात हत्येचा गुन्हा दाखल करण्यात आला असून, त्याला त्वरित अटक करण्यात आली आहे.
