जेजुरी : पुरंदर तालुक्यातील जेजुरी येथे एका घरावर पॅराग्लायडिंग कोसळल्याची धक्कादायक घटना रविवारी सायंकाळी घडली. यामध्ये पुण्यातील एक तरूणी जखमी झाली. तिला तातडीने रुग्णालयात दाखल करण्यात आले. सध्या तिच्यावर रूग्णालयात उपचार सुरु आहेत.
आस्था प्रदीप माने (वय 17) असे या तरुणीचे नाव आहे. पॅराग्लायडिंग साईटवरून उड्डाण करताच चालकाचे पॅराग्लायडरवरील नियंत्रण सुटल्याची ही दुर्घटना झाल्याची प्राथमिक माहिती समोर आली. आस्था यामध्ये जखमी झाली. तिला जवळच्या खाजगी रुग्णालयात दाखल केले असून, तिच्यावर उपचार सुरू आहेत.
दरम्यान, पॅराग्लायडिंग करणाऱ्या चालकाला सुदैवाने कोणतीही दुखापत झाली नाही. पोलिसांनी घटनास्थळी धाव घेत या प्रकरणाचा तपास सुरु केला आहे.
बीडमध्येही घडली होती घटना
काही दिवसांपूर्वी बीडमध्ये देखील अशाच प्रकारची घटना घडली होती. वैजनाथ येथे पॅराग्लायडिंग करताना महिला पायलटचा मृत्यू झाला होता. त्यामुळे आता अपघातातून वाचण्यासाठी नियमावली कधी लागू होणार? असा सवाल केला जात आहे.
