पंढरपूर: पंढरपूर शहरात सुरू असलेल्या (Pandharpur News) जिल्हा परिषद आणि (ZP Election) पंचायत समिती निवडणुकीदरम्यान मतदान केंद्र परिसरात गोंधळाची स्थिती निर्माण झाली. झेडपी मतदान केंद्राच्या 100 मीटर परिसरात भाजपचे पदाधिकारी आणि कार्यकर्ते वावरत असल्याचा आरोप करत शरद पवार गटाचे खासदार धैर्यशील मोहिते पाटील यांनी पोलिस आणि निवडणूक प्रशासनाला कडक शब्दांत सुनावले.
मतदानासाठी आले असताना नियमांचा भंग होत असल्याचे लक्षात येताच खासदार मोहिते पाटील संतप्त झाले. मतदान केंद्रापासून 100 मीटरच्या आत कोणत्याही राजकीय पदाधिकारी किंवा कार्यकर्त्यांना थांबण्यास मनाई असताना भाजपशी संबंधित लोक खुलेआम फिरत असल्याचा आरोप त्यांनी केला. विशेष म्हणजे, हे लोक संबंधित मतदारसंघातील मतदारही नसल्याचा मुद्दा त्यांनी उपस्थित केला. पोलीस प्रशासन त्यांच्यावर कोणतीही कारवाई करत नसल्याने संताप अधिक वाढल्याचे पाहायला मिळाले. यानंतर पोलिसांनी हालचाल करत 100 मीटरच्या परिसरातील कार्यकर्त्यांना बाहेर काढण्यास सुरुवात केली.
याचबरोबर, ग्रामीण भागात संशयास्पद पद्धतीने मतदारांचे सर्वे सुरू असल्याचाही गंभीर आक्षेप खासदार मोहिते पाटील यांनी नोंदवला. माळशिरस तालुक्यात मतदानाच्या दिवशी लॅपटॉप आणि लहान इलेक्ट्रॉनिक मशीनच्या माध्यमातून मतदारांचा डेटा गोळा केला जात असल्याचे व्हिडिओ सोशल मीडियावर व्हायरल झाले आहेत. या प्रकारामुळे निवडणूक प्रक्रियेच्या पारदर्शकतेवर प्रश्नचिन्ह निर्माण होत असल्याचे त्यांनी सांगितले.
यावेळी बोलताना खासदार मोहिते पाटील म्हणाले की, “हा 100 मीटरचा परिसर स्पष्टपणे प्रतिबंधित आहे. अकलूज नगरपालिकेतील भाजप पदाधिकाऱ्यांचा या मतदान केंद्राशी काहीही संबंध नाही. तरीही ते येथे येऊन दहशत निर्माण करत आहेत. कायद्याचा आणि सत्तेचा गैरवापर कसा केला जातो, याचे हे उदाहरण आहे. जर स्वतःच्या कामावर विश्वास असेल, तर अशा प्रकारे मतदान केंद्रांभोवती फिरण्याची गरजच पडू नये.”
तसेच त्यांनी आरोप केला की, काही ठिकाणी त्यांच्या कार्यकर्त्यांनी अशा सर्वे करणाऱ्यांना पकडले आहे, मात्र पोलीस प्रशासन किंवा निवडणूक आयोगाकडून ठोस कारवाई होताना दिसत नाही. तरीही आम्ही शेवटपर्यंत लढा देऊ, असा इशाराही त्यांनी दिला.
या घटनेमुळे पंढरपूर आणि माळशिरस तालुक्यातील निवडणूक वातावरण तापले असून, निवडणूक आयोगाची पुढील भूमिका काय असेल, याकडे सर्वांचे लक्ष लागले आहे.
