पोपट पाचंगे
रांजणगाव गणपती: आषाढी एकादशीच्या पाश्वभूमीवर श्री क्षेत्र ढोकसांगवी, ता.शिरुर येथील एक हजारहुन अधिक भाविकांना आरामबसद्वारे श्री क्षेत्र पंढरपूरची वारी घडविण्यात आली. येथील युवा उद्योजक पै.किरण पाचंगे यांच्या पुढाकारातून या उपक्रमाचे सलग चौथ्या वर्षीही आयोजन करण्यात आले होते. पाचंगे दाम्पत्याने भाविकांना वारीसाठी शुभेच्छा दिल्या.
गावातील ग्रामदैवत श्री खंडोबा देवाची आरती झाल्यानंतर पंचायत समितीच्या सदस्या मनिषा पाचंगे व भाजपचे माजी अध्यक्ष सतिश पाचंगे या उभयतांच्या हस्ते श्रीफळ वाढविण्यात आला. ढोकसांगवी गावाला समृद्ध धार्मिक आणि सांस्कृतिक परंपरा लाभली आहे, येथील धार्मिक व अध्यात्मिक परंपरा जपण्यासाठी या वारीचे उद्योजक पाचंगे यांच्याकडून करण्यात येत असलेले आयोजन निश्चितच कौतुकास्पद असल्याचे शिरुर प्रिंटिंग प्रेस असोसिएशनचे अध्यक्ष ऍड बाबुराव पाचंगे व तंटामुक्ती समितीचे अध्यक्ष काळुराम मलगुंडे यांनी यावेळी सांगितले. माजी सरपंच गीताराम पाचंगे यांनी आभार मानले.
