पुणे : पावसाळ्यात मुळशी आणि ताम्हिणी घाट परिसरातील निसर्गसौंदर्य पाहण्यासाठी मोठ्या संख्येने पर्यटक बाहेर पडतात. हिरवाईने नटलेले डोंगर, धबधबे आणि धरण परिसर पाहण्यासाठी पुणेकरांची या भागाला मोठी पसंती असते. मात्र, वीकेंडच्या दिवशी होणारी वाहतूक कोंडी आणि लांबचा प्रवास यामुळे अनेक पर्यटकांना त्रास सहन करावा लागतो. पीएमपीचे अध्यक्ष महेश आव्हाड यांच्या निर्देशानुसार ही विशेष बससेवा 29 जुलैपासून सुरू करण्यात आली आहे. सध्या पीएमपीकडून शहरातून 13 विविध पर्यटन मार्गांवर बससेवा चालवली जात आहे.
हीच अडचण लक्षात घेऊन पुणे महानगर परिवहन महामंडळाने (PMPML) पर्यटकांसाठी खास बससेवा सुरू केली आहे. मुळशी परिसरातील प्रसिद्ध पर्यटनस्थळांचा आनंद घेण्यासाठी ‘विशेष पर्यटन बससेवा क्रमांक 9 अ’ सुरू करण्यात आली आहे. त्यामुळे आता पुणेकरांना स्वतःचे वाहन घेऊन जाण्याची गरज भासणार नाही.
ही बससेवा पुणे स्टेशन येथून सुरू होणार असून स्वारगेट आणि डेक्कन जिमखाना मार्गे पर्यटकांना मुळशी भागात घेऊन जाईल. या एका दिवसाच्या सहलीमध्ये मुळशी शिवालय मंदिर, जेटी बोटिंग, टाटा मुळशी धरण आणि पळसे धबधबा अशा आकर्षक ठिकाणांना भेट देता येणार आहे.
विशेष म्हणजे या संपूर्ण प्रवासासाठी पर्यटकांना फक्त 500 रुपयांचे तिकीट द्यावे लागणार आहे. या तिकिटामध्ये दिवसभराचा सुरक्षित आणि आरामदायी प्रवास करता येणार आहे. पर्यटन पूर्ण झाल्यानंतर ही बस पुन्हा डेक्कन, स्वारगेट मार्गे पुणे स्टेशन येथे परत येईल.
मुळशी पर्यटन बससाठी आगाऊ आरक्षणाची सुविधाही उपलब्ध करून देण्यात आली आहे. पर्यटकांना डेक्कन जिमखाना, पुणे स्टेशन, स्वारगेट, कात्रज, हडपसर गाडीतळ, भोसरी बसस्थानक, निगडी आणि मनपा भवन या केंद्रांवरून तिकीट बुक करता येणार आहे.
पावसाळ्यातील निसर्गाचा आनंद सुरक्षित, स्वस्त आणि पर्यावरणपूरक पद्धतीने घेण्यासाठी पुणेकरांनी या विशेष बससेवेचा लाभ घ्यावा, असे आवाहन पीएमपी प्रशासनाने केले आहे.
