वॉशिंग्टन : अमेरिका आणि इराण यांच्यातील तणाव पुन्हा एकदा गंभीर बनला आहे. दोन्ही देशांमध्ये शांततेची चर्चा होण्याची शक्यता व्यक्त केली जात असतानाच अमेरिकन सैन्याने इराणच्या तेल नेटवर्कशी संबंधित असल्याचा आरोप असलेल्या 5 तेल टँकरना लक्ष्य केले. ओमानच्या आखातासह खार्ग बेटाजवळ ही कारवाई करण्यात आल्याची माहिती समोर आली आहे.
माहितीनुसार, इराणकडून अमेरिकन नौदलाच्या जहाजावर बॅलिस्टिक क्षेपणास्त्रांचा हल्ला करण्यात आला होता. या हल्ल्यांना अमेरिकन नौदलाने प्रत्युत्तर देत परिस्थिती नियंत्रणात आणली. त्यानंतर अमेरिकेने M/T Kaviz, M/T Charminar, M/T Horizon 1, M/T Riesco आणि M/T Derya या तेल टँकरवर कारवाई केल्याचे सांगण्यात आले आहे.
अमेरिकेने कारवाई करण्यापूर्वी संबंधित टँकरवरील कर्मचाऱ्यांना सुरक्षित ठिकाणी जाण्याचा इशारा दिल्याचे म्हटले आहे. या जहाजांमधून होणाऱ्या कथित बेकायदेशीर तेल व्यापारातून मिळणारा पैसा इराणच्या इस्लामिक रिव्होल्युशनरी गार्ड कॉर्प्स (IRGC) आणि त्यांच्याशी संबंधित संघटनांना मिळत असल्याचा अमेरिकेचा आरोप आहे.
दरम्यान, इराणच्या सरकारी माध्यमांनी खार्ग आणि जास्क परिसरात हल्ले झाल्याचे वृत्त दिले आहे. या घटनांमध्ये टँकरवरील कर्मचारी सुरक्षित असल्याचेही सांगण्यात आले. दुसरीकडे, IRGC कडून कुवैत आणि बहरीनमधील अमेरिकन लष्करी हितसंबंधांशी संबंधित तेल जहाजांना लक्ष्य करण्याची धमकी देण्यात आल्याचे वृत्त आहे. या संघर्षाचा परिणाम केवळ पश्चिम आशियापुरता मर्यादित राहण्याची शक्यता नसून जागतिक अर्थव्यवस्थेवरही होऊ शकतो.
