अक्षय टेमगिरे
शिक्रापूर : शेजारधर्माच्या नात्यालाच काळिमा फासणारी धक्कादायक घटना शिरूर तालुक्यात उघडकीस आली आहे. दशक्रिया विधीसाठी संपूर्ण कुटुंब घराबाहेर जाणार असल्याची माहिती घराशेजारी राहणाऱ्या व्यक्तीनेच सराईत चोराला पुरवली. त्यानंतर बंद घरावर डल्ला मारून तब्बल २ लाख ६५ हजार रुपयांचे सोन्याचे दागिने लंपास करण्यात आले. या घटनेनंतर शिक्रापूर पोलिसांनी तांत्रिक तपास सीसीटीव्ही फुटेज आणि गुप्त माहितीच्या आधारे अवघ्या काही दिवसांत गुन्ह्याचा छडा लावत चोरीचा संपूर्ण मुद्देमाल जप्त केला आहे.
ढेरंगेवस्ती ता. शिरूर येथील किरण पंडित ढेरंगे हे आपल्या कुटुंबासह दशक्रिया विधीसाठी बाहेरगावी गेले होते. घर बंद असल्याची अचूक माहिती मिळाल्यानंतर आरोपींनी नियोजनबद्ध पद्धतीने घराचे कुलूप तोडले. त्यानंतर घरातील कपाटातून गंठण चैन कानातील वेल डोरले यांसह सुमारे २ लाख ६५ हजार रुपयांचे सोन्याचे दागिने चोरून नेले.
घटनेची माहिती मिळताच शिक्रापूर पोलिसांनी तातडीने तपासाची सूत्रे हाती घेतली. पोलीस निरीक्षक चंद्रशेखर यादव यांच्या मार्गदर्शनाखाली गुन्हे शोध पथकाने परिसरातील सीसीटीव्ही फुटेज तांत्रिक विश्लेषण तसेच गुप्त माहितीच्या आधारे तपास सुरू केला. तपासादरम्यान धनंजय उर्फ धनाजी दत्तात्रय घोडके रा. कात्रज पुणे याचा सहभाग निष्पन्न झाला आहे. त्याला अटक केल्यानंतर त्याने गुन्ह्याची कबुली दिली असून चोरीस गेलेले सर्व सोन्याचे दागिने पोलिसांनी जप्त केले आहेत.
या प्रकरणातील तपासात आणखी एक धक्कादायक बाब समोर आली असून घराशेजारी राहणारा दिपक बाळासाहेब ढेरंगे रा. ढेरंगेवस्ती कोरेगाव भीमा यानेच घरातील हालचालींची माहिती आरोपीला पुरवून चोरी घडवून आणण्यात महत्त्वाची भूमिका बजावल्याचे निष्पन्न झाले आहे. या गुन्ह्याचा पुढील तपास सुरू असून न्यायालयाने मुख्य आरोपीस चार दिवसांची पोलीस कोठडी सुनावली आहे.
ही कारवाई पोलीस अधीक्षक संदीप सिंह गिल्ल, अपर पोलीस अधीक्षक डॉ. शुभम कुमार आणि उपविभागीय पोलीस अधिकारी रविंद्र भोसले यांच्या मार्गदर्शनाखाली शिक्रापूर पोलीस ठाण्याचे पोलीस निरीक्षक चंद्रशेखर यादव यांच्या नेतृत्वाखाली करण्यात आली. या मोहिमेत पोलीस उपनिरीक्षक उमाकांत कुंजीर, महेश डोंगरे, श्रेणी पोलीस उपनिरीक्षक जितेंद्र पानसरे, तसेच गुन्हे शोध पथकातील लहानू बांगर, श्रावण गुपचे, नवनाथ नाईकडे, रोहीदास पारखे, श्रीमंत होनमाने, अमोल दांडगे, शिवाजी चितारे, अमोल नलगे, नारायण वाळके, राम जाधव, मच्छिंद्र निचीत यांनी सहभाग घेत ही उल्लेखनीय कामगिरी बजावली आहे.
