पुणे: पुण्यातील सिंहगड रस्त्यावरील पु. ल. देशपांडे उद्यानात झाडांची बेकायदेशीर तोड करून लाकडांची चोरी केल्याचा धक्कादायक प्रकार समोर आला आहे. या प्रकरणात महापालिकेच्या उद्यान विभागातील कर्मचाऱ्यासह पाच जणांविरुद्ध पर्वती पोलीस ठाण्यात गुन्हा दाखल करण्यात आला असून, पोलिसांकडून पुढील तपास सुरू आहे.
ही घटना 28 जुलै रोजी रात्री साडेनऊच्या सुमारास उघडकीस आली. तन्मय बाबर हे त्यांच्या सहकाऱ्यासह खडकवासला येथून महर्षीनगरकडे जात असताना त्यांना पु. ल. देशपांडे उद्यानात एक टेम्पो उभा असल्याचे दिसले. त्यामध्ये झाडांची तोड केलेले लाकूड भरले जात असल्याचा संशय आल्याने त्यांनी काही अंतरावर टेम्पो अडवून चालकाकडे चौकशी केली.
सुरुवातीला चालकाने आणि त्याच्या सहकाऱ्यांनी ही लाकडे एका सोसायटीतून आणल्याचे सांगितले. मात्र, अधिक विचारणा केल्यानंतर त्यांची उत्तरे विसंगत वाटू लागल्याने बाबर यांनी तातडीने पोलिसांना माहिती दिली. घटनास्थळी दाखल झालेल्या पोलिसांनी टेम्पोतील व्यक्तींची चौकशी केली असता, लाकूड पु. ल. देशपांडे उद्यानातून आणल्याची बाब समोर आली.
तपासादरम्यान आरोपी तुकाराम कुंडगीर याने महापालिकेतील उद्यान मिस्त्री विकास नानासाहेब आटोळे यांच्या सांगण्यावरून झाडे तोडून लाकूड कोंढव्यातील वखारीत नेले जात असल्याची माहिती दिली. त्यानंतर पोलिसांनी विकास आटोळे यांची चौकशी केली. सुरुवातीला त्यांनी आरोप फेटाळले, मात्र पुढील चौकशी आणि उपलब्ध पुराव्यांनंतर त्यांनी झाडे तोडण्यास सांगितल्याची कबुली दिल्याचे पोलिसांनी सांगितले.
तन्मय बाबर यांच्या तक्रारीवरून तुकाराम कुंडगीर, विकास आटोळे आणि त्यांच्या इतर तीन सहकाऱ्यांविरुद्ध भारतीय न्याय संहितेतील चोरी आणि मालमत्तेचे नुकसान केल्याच्या कलमान्वये गुन्हा दाखल करण्यात आला आहे. या घटनेचा व्हिडिओ समोर आल्यानंतर नागरिकांकडून संताप व्यक्त केला जात असून, या प्रकरणात आणखी कोणी सहभागी आहे का, याचाही तपास पोलिसांकडून केला जात आहे.
